Në seancën gjyqësore ndaj Tyler Robinson u transmetua intervista e regjistruar me shokun e tij të dhomës, Lance Twiggs, që dha detaje mbi sjelljen e Robinson para ngjarjes. Deklaratën e prezantoi agjenti i Byrosë së Hetimit të Shtetit të Utah-ut, Brian Davis. Në fillim të videos, Twiggs konfirmoi se ai dhe Robinson kishin jetuar si shokë dhome, secili në dhomën e tij në të njëjtin apartament. Twiggs tha se Robinson i kishte kërkuar t’i huazonte një mjet elektrik të tipit Dremel dhe se ai fliste prej muajsh për një “udhëtim gjuetie” që planifikonte ta bënte me familjen e tij, duke përmendur vazhdimisht udhëtimin gjuetie dhe kampingu.
Gjyqtari Graf vendosi që disa mesazhe me tekst të dërguara nga Robinson, si dhe një shënim me shkrim që prokurorët ia atribuojnë atij, të pranohen si prova dhe të shfaqen në gjykatë. Mbrojtja kundërshtoi publikimin e këtyre materialeve, duke argumentuar se ato mund të ndikojnë tek juria e mundshme në rast se çështja shkon në gjykim. Gjykatësi pranoi që provat të paraqiten, por urdhëroi redaktimin e të dhënave identifikuese, si numrat e telefonit.
Gjatë seancës u bënë edhe ndërprerje të shkurtra për shqyrtimin e provave video. Robinson u pa në sallë i veshur me kostum gri dhe këmishë të bardhë, ulur pranë avokatëve të tij dhe duke ndjekur procedurat.
Në seancë foli gjithashtu Jeffrey Neiman, avokati që përfaqëson Erika Kirk dhe familjen e saj. Ai kërkoi që provat të shfaqeshin në sallën e gjyqit edhe nëse nuk transmetoheshin drejtpërdrejt, duke theksuar se “Familja Kirk ka pritur 10 muaj për këtë seancë. Ata kanë të drejtë të jenë këtu, të dëgjojnë provat dhe të shohin se çfarë po ndodh në gjykatë”.
Procedurat pritet të vazhdojnë me paraqitjen e provave dhe dëshmive të tjera, ndërsa gjykata do të vendosë për hapat e mëtejshëm të çështjes.
