Kryebashkiaku i Tiranës, Erion Veliaj, i është drejtuar Gjykatës së Lartë me kërkesën për ndryshimin e masës së sigurisë “arrest në burg”, duke kërkuar lirimin e menjëhershëm dhe shqyrtim në themel të pretendimeve të tij, pa kthim për rigjykim në shkallët e ulëta. Shorti për gjyqtarin që do të shqyrtojë çështjen u hodh sot dhe i caktuar është Ilir Panda. Mbrojtja argumenton se çështja është kryesisht juridike dhe kushtetuese, prandaj Gjykata e Lartë ka kompetencë të vendosë përfundimisht, pasi nuk kërkohen prova të reja apo rivlerësim i fakteve.
Në kërkesën për rishqyrtim mbrojtja kërkon që gjykata të vlerësojë nëse masa “arrest në burg” mbetet e nevojshme dhe proporcionale, nëse rreziqet procedurale janë argumentuar në mënyrë të qartë dhe nëse janë shqyrtuar me seriozitet masa alternative të sigurisë. Një nga çështjet e ngritura është edhe trajtimi i Veliajt gjatë seancave gjyqësore, konkretisht mbajtja e tij brenda një “kafazi” prej xhami; mbrojtja pretendon se kjo praktikë cenuese shkel dinjitetin njerëzor dhe parimin e prezumimit të pafajësisë, duke kërkuar heqjen e tij nga ky mënyrë paraqitjeje gjatë proceseve gjyqësore.
Mbrojtja thekson gjithashtu se Veliaj është zgjedhur për një mandat katërvjeçar, nga qershori 2023 deri në qershor 2027, dhe se vijimi i arrestit bën praktikisht të pamundur ushtrimin e detyrës së kryebashkiakut. Sipas saj, kjo gjendje prek jo vetëm lirinë personale të Veliajt, por edhe të drejtën e qytetarëve që e kanë zgjedhur si përfaqësues. Avokatët paralajmërojnë se kthimi i çështjes për rishqyrtim në gjykatat e shkallëve të ulëta do të shkaktonte vonesa të tjera procedurale, duke rrezikuar që një vendim përfundimtar të merrej pasi një pjesë e konsiderueshme e mandatit të jetë kaluar, çka do ta bënte të vështirë rikthimin efektiv të të drejtave të pretenduara të cenuara.
Për këto arsye, mbrojtja i kërkon Gjykatës së Lartë që të ushtrojë kompetencën e saj, të ndryshojë masën e sigurisë dhe të urdhërojë lirimin e menjëhershëm të Erion Veliajt.
