Ylli brazilian Neymar po konsideron seriozisht t’i japë fund karrierës si futbollist pas eliminimit të Brazilit nga Kupa e Botës. Sipas mediave braziliane, sulmuesi i Santos do të marrë kohë për të reflektuar përpara se të marrë vendimin përfundimtar. 34-vjeçari pati një rol të kufizuar në turneun e zhvilluar në Shtetet e Bashkuara, Kanada dhe Meksikë, duke luajtur më pak se 45 minuta në total, dhe përfshirja e tij në skuadrën e trajnerit Carlo Ancelotti u shoqërua me polemika.
Pas humbjes ndaj Norvegjisë në 1/8-tat, Neymar njoftoi tërheqjen e menjëhershme nga kombëtarja braziliane. Ai ndodhet aktualisht në SHBA me familjen dhe nuk ka caktuar datë për rikthimin në fushë. Burime pranë lojtarit thonë se ai ndihet i zhgënjyer për mungesën e vlerësimit për kontributin e tij ndaj Brazilit dhe është i lodhur nga presioni i vazhdueshëm që shoqëron futbollin.
Neymar është golashënuesi më i mirë në historinë e Brazilit me 80 gola, duke kaluar legjendën Pele në vitin 2023. Megjithatë, pavarësisht paraqitjeve individuale të shquara në Botërore, ai nuk ka arritur ta udhëheqë “Seleçaon” drejt fitimit të titullit. Në Botërorin e 2014 ai u detyrua të largohej për shkak të dëmtimit, ndërsa Brazili pësoi humbjen 7-1 ndaj Gjermanisë në gjysmëfinale. Në 2018 Brazili u eliminua nga Belgjika, ndërsa në Katar 2022 goli i tij spektakolar ndaj Kroacisë nuk mjaftoi për të shpëtuar nga eleminimi pas penalltive.
Edhe në ndeshjen kundër Norvegjisë, Neymar shënoi një gol nga pika e bardhë, por ai shërbeu vetëm për të zbutur humbjen. Pas vërshëllimës së fundit u pa duke qarë, dhe më vonë deklaroi: “U përpoqa. U përpoqa. Gjithçka nisi këtu, në MetLife Stadium, dhe përfundoi po këtu. Tani gjithçka ka marrë fund.”
