Ministri për Evropën dhe Punët e Jashtme, Ferit Hoxha, i pranishëm së bashku me kryeministrin Edi Rama në Samitin e NATO-s në Ankara, foli në një intervistë live për edicionin qendror të lajmeve në Top Channel për zhvillimet kryesore të samitit dhe angazhimet e aleancës. Ai komentoi vendimet lidhur me rritjen e investimeve në mbrojtje dhe njoftimin që Shqipëria do të presë një nga samitet e ardhshme të NATO-s, duke theksuar rëndësinë e këtij vendimi për aleancën dhe për vendin tonë.
Hoxha tha se delegacioni shqiptar erdhi në samit me një pozicion të qartë dhe me angazhim për rritjen e investimeve në mbrojtje, pjesë e qasjes së re të aleancës. Ai përmendi objektivin që të gjitha vendet e NATO-s të shkojnë deri në vitin 2030 në 5% të Prodhimit të Brendshëm Bruto për investimet në mbrojtje, si një orientim që synon rritjen e kapaciteteve për t’u mbrojtur ndaj rrezikut rus dhe ndaj kërcënimeve të tjera hibride.
Lajmi për mbajtjen e një samiti në Tiranë u përshkrua si rezultat i punës së institucioneve shqiptare; Hoxha e quajti një lajm pozitiv dhe një angazhim të madh për vitet e ardhshme, si dhe një mundësi për të treguar aftësitë e Shqipërisë në pritjen e eventeve të mëdha ndërkombëtare. Ai theksoi se vendimi është paralajmëruar dhe pasqyron përgatitjen institucionale për të marrë përsipër organizimin e një aktiviteti të tillë.
Sa i përket datës së samitit, Hoxha njoftoi se aleatët vendosën të vazhdojnë bisedimet për kohën e përshtatshme, duke përmendur mundësinë që ai të mbahet në vitin 2027 ose në vitin pasardhës. Shqipëria, sipas ministrit, do të jetë e gatshme: kanë nisur përgatitjet, është ngritur një task-forcë dhe kjo strukturë ishte edhe në Ankara për të fituar eksperiencë dhe për t’u përgatitur në nivelin e duhur.
