Kryeministrja italiane Giorgia Meloni riafirmoi në përfundim të samitit të NATO-s në Ankara angazhimin e Italisë për të përmbushur detyrimet ndaj aleancës, duke theksuar se rritja e shpenzimeve për mbrojtjen do të bëhet në mënyrë të qëndrueshme dhe në funksion të interesit kombëtar. Ajo nënvizoi se investimet në mbrojtje duhet të sjellin përfitime konkrete për vendin: fondet duhet të mbeten në Itali, të mbështesin industrinë vendore, qendrat e kërkimit dhe zhvillimin e territoreve, duke sjellë më shumë siguri dhe vende pune të kualifikuara.
Meloni tha se Italia do të rrisë investimet në mbrojtje dhe siguri deri në 2.8% të Prodhimit të Brendshëm Bruto, duke e paraqitur vendin si një aleat të besueshëm brenda NATO-s dhe duke theksuar se “Italia ofron më shumë personel ushtarak se kushdo tjetër.” Ajo ritheksoi se shtimi i burimeve pa kontrollin e zinxhirëve strategjikë të furnizimit mund të rrezikojë varësinë e vendit dhe se duhet të sigurohet kontrolli i këtyre zinxhirëve.
Kryeministrja foli gjithashtu për ndikimin e teknologjisë në fushën e mbrojtjes: përmendi se një tank milionësh mund të shkatërrohet nga një dron prej 20 mijë eurosh dhe se një operator i trajnuar për dronet mund të jetë më vdekjeprurës se një snajper.
Në raport me Shtetet e Bashkuara, Meloni tha se nuk është penduar për pozicionet e saj dhe nuk do të ndryshojë strategjinë, duke vënë në dukje afërsinë me presidentin Donald Trump për disa çështje si emigracioni dhe temat kulturore, por se qëndrimi i saj mbështet unitetin e Perëndimit.
Për zhvillimet në Lindjen e Mesme, ajo shprehu shqetësim për situatën në Iran dhe konfirmoi qëndrimin e pandryshuar të Italisë për përdorimin e bazave ushtarake italiane. Sa i përket Ukrainës, ajo konfirmoi mbështetjen e plotë të Italisë dhe sqaroi se në takimin me të ashtuquajturit “Vullnetarët” do të marrë pjesë ministri i Jashtëm Antonio Tajani.
Duke u përgjigjur kritikave të opozitës se qeveria po redukton buxhetin e shëndetësisë për armët, Meloni e quajti atë një akuza të pabazë dhe tha se nëse u jepet hapësirë fiskale do ta përdorë për të rritur kapacitetet dhe sigurinë e Italisë.
