Për disa orë, 11 gra nga Izraeli u zhytën në botën e artizanatit tradicional shqiptar në Gjirokastër, ku mësuan qëndisjen pranë mjeshtres Buqe Muka. Në punishten e saj, vizitoret u njohën me teknikat e punimit me dorë, motivet karakteristike të qëndisjeve gjirokastrite dhe historinë që fshihet pas këtij zanati të trashëguar ndër breza. Nën udhëzimin e mjeshtres, ato provuan të realizonin vetë qëndisje, duke përjetuar një eksperiencë autentike dhe duke vlerësuar durimin, përkushtimin dhe mjeshtërinë që kërkon ky art.
Për pjesëmarrëset ky aktivitet nuk ishte thjesht një kurs disaorësh, por një mundësi për t’u njohur nga afër me kulturën, traditat dhe identitetin e Gjirokastrës. Një nga vizitoret shprehet: “Jam shumë e lumtur që jam këtu në Shqipëri. Është hera e parë që përjetoj një eksperiencë të tillë. Më pëlqen shumë kjo përvojë, më sjell qetësi shpirtërore dhe ndihem vërtet mirë. Ju jam shumë mirënjohëse të gjithëve për mikpritjen dhe për këtë mundësi.” Një tjetër vizitore shton: “Unë jam nga Izraeli. Këtë herë kemi ardhur si grup për të vizituar Shqipërinë, por edhe për t’u njohur me traditën shqiptare. Tani po mësojmë të punojmë me dorë dhe kjo është një përvojë shumë e veçantë. Përveç vizitave në qytet, kemi mundësinë të përjetojmë diçka autentike dhe unike, që e bën këtë udhëtim edhe më të bukur.”
Rastet e tilla të turizmit përvojash nënvizojnë një interes në rritje për forma të udhëtimit që shkojnë përtej vizitave në monumente; vizitorët kërkojnë të marrin pjesë në aktivitete që i lidhin drejtpërdrejt me jetën, traditat dhe zanatet e zonës. Përmes punishtes dhe mësimit praktik të qëndisjes, grupi izraelit pati mundësinë të përjetonte nga afër zanatin, të kuptonte pjesë të trashëgimisë kulturore lokale dhe të vlerësonte elementet tradicionale të artit të qëndisjes gjirokastrite.
