Kontributi financiar i vendeve anëtare të NATO-s pritet të jetë një nga temat kryesore në samitin vjetor të aleancës në Ankara. Shqipëria do të përfaqësohet në takim nga kryeministri Edi Rama, ministri i Mbrojtjes Ermal Nufi dhe drejtoresha e SHISH, Vlora Hyseni. Në fokus është edhe një iniciativë e re për financimin e shpenzimeve të mbrojtjes euro-atlantike: krijimi i një banke të posaçme për shpenzime ushtarake, e para e këtij lloji.
Top Channel, duke u bazuar në burime qeveritare, njofton se Shqipëria do të nënshkruajë për t’u bërë pjesë e Defence, Security and Resilience Bank (DSR Bank). Sipas të njëjtave burime, DSR Bank do të jetë një institucion shumëpalësh në pronësi të shteteve pjesëmarrëse, me fokus në financimin e mbrojtjes, sigurisë dhe reziliencës strategjike. Konceptualisht, banka ngjan me një bankë multilaterale zhvillimi, por me mandat të dedikuar për sektorët e sigurisë dhe mbrojtjes.
Shumë shtete synojnë të rrisin investimet në mbrojtje, por përballen me kufizime buxhetore, kosto të larta financimi dhe vështirësi që industria e mbrojtjes të marrë kredi. DSR Bank synon të mobilizojë kapital ndërkombëtar dhe të ofrojë instrumente financiare si financim afatgjatë, garanci dhe mekanizma për të ulur riskun e kreditimit. Qëllimi është të lehtësohen investimet strategjike, të mbështeten prokurimet e përbashkëta dhe të përforcohet financimi i zinxhirit industrial të mbrojtjes.
Iniciativa është zhvilluar nga një grup ekspertësh të financës dhe sigurisë, përfshirë ish-zyrtarë të NATO-s. Në fillim të vitit 2026, Kanadaja mori rol drejtues në diskutimet mes një grupi shtetesh për krijimin e bankës, duke kontribuar në avancimin e bisedimeve për strukturën dhe mekanizmat e saj. Pritet që samiti i NATO-s në Ankara të shërbejë si forum për finalizimin e disa elementeve kyçe të iniciativës dhe për vendimet e shteteve pjesëmarrëse rreth angazhimit të tyre financiar dhe strukturës së DSR Bank.
