Shtetet e Bashkuara festojnë 250-vjetorin e Pavarësisë me aktivitete në të gjithë vendin. Në Uashington DC, festimet përfshijnë fishekzjarre në shkallë të gjerë, një fluturim të avionëve luftarakë dhe një tubim të presidentit Donald Trump. Në Nju Jork, Filadelfia dhe Los Angeles janë planifikuar koncerte festive ku do të performojnë emra të njohur të muzikës.
Mesazhi i parë për këtë përvjetor erdhi nga zëvendëspresidenti JD Vance, i cili falënderoi presidentin Donald Trump gjatë një fjalimi në Nju Jork. “Sot festojmë 250 vjet Amerikë, duke u përballur me të ardhmen pa frikë. Festojmë 250 vjet, duke provuar se çfarë mund të arrijë një popull i lirë”, u shpreh Vance para marinarëve, oficerëve të policisë, punonjësve të emergjencave të SHBA-së, si dhe dhjetëra shefave të marinës që po vizitojnë vendin nga e gjithë bota. Ai gjithashtu lexoi paragrafin e dytë të Deklaratës së Pavarësisë: “Ne i konsiderojmë këto të vërteta si provë se të gjithë njerëzit janë krijuar të barabartë, se ata janë të pajisur nga krijuesi i tyre me të drejta të caktuara të patjetërsueshme dhe midis këtyre të drejtave janë jeta, liria dhe ndjekja e lumturisë.”
Disa ngjarje të planifikuara janë ndërprerë për shkak të paralajmërimeve meteorologjike për temperatura jashtëzakonisht të larta dhe stuhish, ndërsa një valë vape përvëluese prek pjesë të SHBA-së lindore dhe qendrore. Ngjarje të shumta në të gjithë vendin janë anuluar, ndërsa disa janë shtyrë për më vonë gjatë ditës.
Në një fjalim të mbajtur mbrëmë në malin ikonë Mount Rushmore, Presidenti Donald Trump e përshkroi festën si “një nga ditët më të jashtëzakonshme në historinë e botës”. Ai deklaroi se “identiteti amerikan është nën një sulm të ri” dhe shtoi se “ka pasur një përpjekje të pamohueshme… për të na rrëzuar shpirtin amerikan”.
