Kampionati shqiptar do të vijë në sezonin e ri me ndryshime të mëdha, të synuara për rritjen e konkurrencës, cilësisë dhe për të nxitur zhvillimin e futbollistëve vendas. Pas eksperiencës së sezonit të shkuar, kur FSHF hoqi kufizimin e numrit të të huajve në fushë, u vu re se kjo masë nuk solli përmirësim të dukshëm të cilësisë dhe reduktoi mundësitë e të rinjve nga akademitë.
Top Channel konfirmon se Komiteti Ekzekutiv do të vendosë që në Kategorinë Superiore të ketë një limit prej 7 futbollistësh të huaj të aktivizuar në fushë njëkohësisht, ndërsa numri maksimal i të huajve që lejohet të regjistrohen do të jetë 9. Në këtë kuadër, nuk konsiderohen si të huaj futbollistët që kanë pasaportë të Kosovës ose të Maqedonisë së Veriut.
Një tjetër vendim i rëndësishëm është detyrimi për aktivizimin e të paktën një futbollisti U-18 për 45 minuta në ndeshje. Ky rregull synon t’i detyrojë klubet të mbështeten më shumë te akademitë e tyre dhe të krijojë mundësi për zhvillimin e talenteve më të spikatura të sistemit të formimit të futbollistëve shqiptarë.
Ndërhyrjet rregullatore janë pjesë e një paketë ndryshimesh që përfshin edhe modifikimin e formatit të kampionatit, të cilin FSHF e miratoi disa javë më parë. Përmes kombinimit të kufizimeve për të huajt dhe përfshirjes së të rinjve në lojë, autoritetet synojnë të rivendosin ekuilibrin mes përdorimit të lojtarëve të huaj dhe zhvillimit të bazës së brendshme të futbollistëve, duke rritur shanset e talenteve të akademive për të marrë minuta loje dhe për t’u rritur profesionalisht brenda klubit.
