Avokati Alban Duraj reagoi pas shoqërimit në komisariat të 20 protestuesve pas tensioneve pranë Kuvendit dhe i bëri thirrje Kryeministrit Edi Rama dhe institucioneve të linë të lirë personat e ndaluar, duke theksuar se ata nuk kanë kryer asnjë shkelje. Duraj kërkoi lirimin e menjëhershëm dhe njoftoi se po përgatitet kallëzimi penal, duke paralajmëruar se do të mbahen përgjegjës të gjithë ata që kanë vepruar në kundërshtim me ligjin.
Ai i bëri thirrje policisë, komisariatit dhe ministrit të Brendshëm të respektojnë ligjin dhe të veprojnë në përputhje me detyrimet ligjore, ndërsa shtoi se prokuroria do të nisë hetimet pasi kallëzimi të depozitohet. Duraj deklaroi se janë shkelur të gjitha kriteret kur arrestohet dikush në flagrancë dhe se nuk ka pasur asnjë vepër penale nga ana e protestuesve, të cilët, sipas tij, ushtruan vetëm të drejtën për të protestuar.
Avokati tha se nuk kanë marrë asnjë përgjigje nga autoritetet dhe akuzoi institucionet se presin urdhra me natyrë politike. Ai përmendi gjithashtu se policia ka përdorur dhunë ndaj protestuesve, me punonjës që kanë qenë me shkopinj gome dhe në numër të madh. Përveç kërkesës për lirimin e menjëhershëm nga drejtori i policisë, Duraj kërkoi që prokurori i çështjes të urdhërojë të njëjtën masë.
Thirrja e tij u drejtuar në dy linja: drejtuesve të policisë dhe Ministrisë së Brendshme, dhe Kryeministrit Rama, të cilit i kërkoi të ndërhyjë për të siguruar lirimin dhe kthimin e protestuesve te familjet e tyre, në mënyrë që të vazhdojnë jetën normalisht. Duraj u shpreh se kjo kërkesë shërben edhe për vijimësinë e protestave, duke parashikuar se protesta e datës 4 do të jetë ndër më të mëdhatë, dhe akuzoi policinë se kishte plan për të penguar aktivistët kryesorë të kësaj kategorie protestash.
