Gjykata Kushtetuese publikoi vendimin e 25 majit, me të cilin urdhëroi kthimin për rishqyrtim në Gjykatën e Lartë kërkesën për liri të kryebashkiakut të Tiranës, Erion Veliaj, dhe zbardhi arsyetimet e gjyqtarëve. Pesë gjyqtarë — Genti Ibrahimi, Sandër Beci, Sonila Bejtja, Fiona Papajorgji dhe Ilir Toska — mbajtën qëndrim pro kthimit të çështjes në gjykatë të shkallës së dytë. Katër prej tyre (Ibrahimi, Beci, Bejtja, Papajorgji) vlerësuan se pretendimi i Veliajt se masa e sigurimit “Arresti në burg” është joproporcionale dhe cenon të drejtën për t’u zgjedhur është i bazuar, dhe se Gjykata e Lartë duhej ta kishte shfuqizuar vendimin, pasi nuk kishte konstatuar këtë shkelje dhe kishte dështuar në rolin e saj kontrollues për respektimin e të drejtave themelore.
Gjyqtarja Sonila Bejtja, në argumentim paralel, tha se Veliaj është arrestuar pa prova të mjaftueshme dhe se qëndrimi i tij në burg shkel Konventën Europiane për të Drejtat e Njeriut. Ajo theksoi se gjykatat kanë dështuar të arsyetojnë në përputhje me praktikën e Gjykatës Kushtetuese dhe GJEDNJ-së, duke mos bindur një vëzhgues objektiv se kërkuesi mund të ketë kryer veprat penale të akuzuara. Bejtja kërkoi që Shkalla e Parë, Apeli dhe Gjykata e Lartë të riparojnë shkeljet dhe të rivendosin liritë e kushtetuara të Veliajt.
Gjyqtarja Marsida Xhaferllari konstatoi se mbajtja e Veliajt në kabinën prej xhami gjatë procesit gjyqësor, në mungesë verifikimi të kushteve përjashtuese, cenon dinjitetin e tij, por shtoi se kjo shkelje nuk domosdoshmërisht kërkon shfuqizimin e masës së sigurimit nëse vendimet e tjera plotësojnë garancitë kushtetuese. Gjyqtarja Marjana Semini pohoi gjithashtu cenimin e dinjitetit dhe se gjatë paraburgimit është cenuar e drejta e komunikimit me avokatin, duke vlerësuar kërkesën pjesërisht të bazuar për këto shkelje. Ilir Toska theksoi mungesën e arsyetimit nga Gjykata e Lartë për kufizimin e lirisë në raport me të drejtën për t’u zgjedhur dhe propozoi kthimin e çështjes për trajtim edhe të pretendimeve mbi mbrojtjen dhe prezumimin e pafajësisë.
I vetmi që mbrojti rrëzimin e kërkesës ishte gjyqtari Asim Vokshi, i cili vlerësoi se pretendimet për cenim dinjiteti dhe proporcionalitet janë të pabazuara dhe arresti i ligjshëm.
