Presidenti i Shteteve të Bashkuara, Donald Trump, deklaron se ka siguruar mbi 1 miliard dollarë të ardhura gjatë vitit 2025, me pjesën më të madhe të tyre nga biznese të lidhura me kriptovalutat, sipas deklaratës financiare detyruese prej 927 faqesh. Në këtë raport thuhet se 635 milionë dollarë vijnë nga honoraret e monedhës dixhitale “Trump”, e cila u lançua pak ditë para rikthimit të tij në Shtëpinë e Bardhë, edhe pse vlera e saj ka rënë që atëherë. Ai gjithashtu ka deklaruar më shumë se 500 milionë dollarë të ardhura nga World Liberty Financial, një kompani kriptomonedhash e themeluar nga djemtë e tij dhe fëmijët e të dërguarit të posaçëm Steve Witkoff.
Përveç sektorit të kriptovalutave, deklarata përfshin fitime të konsiderueshme nga bizneset e pasurive të paluajtshme, klubet e golfit dhe produktet e markës së tij, përfshirë orën, Bibëlën, parfumet dhe artikuj të tjerë të markuar me emrin Trump. Shtëpia e Bardhë mohoi se presidenti po përfiton nga posti i tij, duke theksuar se bizneset e Trump administrohen nga një fond i menaxhuar nga djemtë e tij dhe se nuk ekziston konflikt interesi.
Megjithatë, në reagime të jashtme, ish-këshilltari për etikën në Shtëpinë e Bardhë gjatë presidencës së George W. Bush, Richard Painter, e përshkroi situatën si një “konflikt të qartë interesi”. Ekspertë të tjerë vënë në dukje se mënyra si Trump menaxhon pasuritë e tij është ndryshe nga praktikat e presidentëve të mëparshëm amerikanë.
Raporti përfshin edhe të dhëna mbi të ardhurat e Zonjës së Parë, Melania Trump, e cila ka marrë 10.7 milionë dollarë nga një marrëveshje licencimi për një dokumentar mbi jetën e saj dhe 6 milionë dollarë nga shitja e NFT-ve. Sipas vlerësimeve të publikuara nga revista Forbes, pasuria e Donald Trump llogaritet aktualisht rreth 6 miliardë dollarë, ndërsa Bloomberg Billionaires Index e vlerëson atë në 7.6 miliardë dollarë.
