Pesë persona u plagosën, njëra prej të cilave ndodhet në gjendje kritike dhe e intubuar, pas tre sulmeve të koordinuara me zjarrvënie që ndodhën në orët e para të së mërkurës në Selanik. Objektiva e sulmeve ishin banesat e tre drejtuesve të partisë greke Demokracia e Re (ND). Autoritetet thanë se sulmet ndodhën brenda më pak se 20 minutash dhe dyshojnë se autorët lëviznin me motoçikleta; Shërbimi i Antiterrorit po heton mundësinë e një plani të organizuar.
Sulmi më i rëndë ndodhi në zonën Harilaou rreth orës 04:35, kur një bombol gazi shkaktoi zjarr që u përhap shpejt, duke përfshirë dy automjete dhe dy motoçikleta. Njëri prej automjeteve i përkiste politikanes Aphrodite Nestora. Nëna 70-vjeçare e Nestorës pësoi djegie të rënda në të gjithë trupin dhe po trajtohet e intubuar në Njësinë e Kujdesit Intensiv të spitalit “Ippokrateio”. Vetë Aphrodite Nestora pësoi djegie të lehta në gjymtyrë, ndërsa babai i saj dhe dy banorë të tjerë të pallatit u dërguan në spital për probleme me frymëmarrjen të shkaktuara nga tymi. Zjarri shkaktoi dëme materiale, duke shkatërruar dy automjete dhe dëmtuar dy motoçikleta.
Pak minuta më parë, rreth orës 04:23, një tjetër sulm u regjistrua në zonën Tumba, ku persona të panjohur vendosën një bombol gazi në hyrje të pallatit ku banon ish-deputeti Savvas Anastasiades. Shpërthimi shkaktoi dëmtime në hyrjen e godinës, thyerje xhamash dhe dëmtime të fasadës, por nuk pati të lënduar. Sulmi i parë ndodhi në orën 04:18 në Pylaia, kur një bombol gazi u vendos dhe u aktivizua pranë një godine që më parë ishte banesë e kryetarit të Komitetit Drejtues të Demokracisë së Re në Selanik, Zisis Ioakimoviç; në këtë rast nuk u raportuan dëme materiale apo të lënduar.
Autoritetet greke po analizojnë pamjet e kamerave të sigurisë dhe prova të tjera për të identifikuar autorët. Hetimet janë përqendruar në mundësinë që të tre sulmet të jenë pjesë e një operacioni të mirëorganizuar kundër figurave të partisë në pushtet.
