Sot u mbajt në kryeqytet dita e 30-të e protestës qytetare, e nisur kundër një projekti në Zvërnec dhe e zgjeruar prejatë me kërkesa dhe shqetësime të tjera. Në emisionin “Top Story”, autorja dhe moderatore Grida Duma theksoi se kërkesat e protestuesve nuk lidhen vetëm me çështje financiare e përfitimi, por përbëjnë një vizion për të ardhmen dhe për të përcaktuar se çfarë duan shqiptarët për veten e tyre, si dhe një kërkesë llogarie ndaj një klase politike që i ka zhgënjyer. Ajo vuri në dukje se protesta në bulevard përballet me etiketime si patriotizëm, ambientalizëm apo historicizëm, por pas Zvërnecit kanë lindur kauza të ndryshme – të përmbledhura në grupe 5, 13, 27 pikat – që të gjitha kanë legjitimitetin e tyre në adresimin e institucioneve përkatëse.
Duma thekson se dilema qendrore për reagimin qytetar është nëse lëvizja do të prodhojë më shumë dështim dhe zhgënjim nëse dështon, apo zhvillim dhe pasuri për shqiptarët nëse do të jetë e suksesshme. Ajo argumentoi se këto çështje janë kryesisht politike, jo vetëm ekonomike, dhe se debati rreth tyre ka qenë prezent në tavolina me mendësi që shikojnë nga Perëndimi, ku profesorë dhe profesionistë kanë diskutuaar prej vitesh se si duhet të zhvillohet Shqipëria. Në fokus është pyetja nëse duhet të lejohet hyrja e investitorëve të mëdhenj të huaj që mund të sjellin marka ndërkombëtare dhe mbrojtje kundër agjendave shkatërruese ekonomike, duke pasur parasysh nevojën për zhvillim përtej kapaciteteve vendase.
Sipas Dumës, çështjet duhet të trajtohen duke shmangur keqpërdorimin e reagimit qytetar për të shkatërruar mundësi dhe opsione. Projekti në Zvërnec është identifikuar si thembra e Akilit, por diskutimi politik do të zgjasë për të përcaktuar sesi qeveria dhe shoqëria do të vendosin kufijtë midis asaj që duhet zhvilluar dhe asaj që duhet mbrojtur. Ajo përmendi gjithashtu se në protesta janë shfaqur pankarta me kritika ndaj presidentit të SHBA-së dhe çështjeve të Izraelit e Palestinës, duke konstatuar se perceptimi ndaj investimeve të huaja në Shqipëri ka ndryshuar nga mikpritja drejt paragjykimit. Në thelb, sipas saj, bëhet fjalë për një vizion të ardhmërise dhe për llogaridhënie ndaj klasës politike. Burimi: Top Channel.
