Emisioni Fiks Fare denoncoi trajtimin e peshëngritësit Laurenc Hasko, kampion kombëtar në peshën 65 kg, i cili thotë se është lënë pa pagesa mujore për trajtim ushqimor që parashikon ligji dhe është detyruar të përballet me vështirësi ekonomike. Sipas vendimit të qeverisë nr. 789, miratuar më 15 dhjetor 2021, sportistët kampionë përfitojnë trajtim ushqimor dhe mjekësor; në pikën 9 përcaktohet se trajtimi ushqimor ishte së paku 2.500 lekë në ditë për 25 ditë (62.500 lekë në muaj), ndërsa në prill 2026 ky shumë u rrit në 3.500 lekë në ditë (87.500 lekë në muaj). Laurenci u shpall kampion në shtator 2025 dhe në mars 2026, por thotë se nuk ka marrë pagesat e parashikuara; ka marrë vetëm një shpërblim prej 100.000 lekësh për vendin e parë për një nga garat.
Hasko rrëfen se vjen nga fshati Kosovë e Vogël në Lushnjë, i kalon mbi 20 km çdo ditë për stërvitje dhe ka ndihmuar babanë e tij si elektrik jashtë vendit për të vazhduar sportin. Ai deklaron se pas një gare në maj 2026 ku doli i pari në peshën e tij nuk ka marrë asnjë shpërblim dhe se ka kërkuar me muaj takim në bashki pa rezultat, duke u sorollatur dhe pa u pranuar nga kryetarja e Bashkisë.
Gjatë qëndrimit të ekipit të Fiks Fare në Bashkinë e Lushnjës, Presidenti i Federatës Shqiptare të Peshëngritjes, Elez Gjoza, telefonoi Haskon dhe më pas tha për emisionin se Federata kishte një vendim që ndalon sportistët të japin deklarata. Gjoza u shpreh se ishte njoftuar nga trajneri i ekipit të Lushnjës për rastin dhe se Haskos i takon paga dhe shpërblimi, duke premtuar se do të interesohej dhe do të fliste me kryetaren e bashkisë.
Në përgjigjen zyrtare të Bashkisë së Lushnjës për Fiks Fare thuhet se në 2025 dhe 2026 peshëngritësi ka përfituar mbështetje financiare prej 100.000 lekësh si vendi i parë, dhe se bashkia është në kontakt me Federatën për forma alternative mbështetjeje për sportistë premtues. Një ditë pas interesimit të emisionit, Gjoza i komunikoi Haskos dhe institucionit se bashkia do të zbatojë VKM-në dhe do ta trajtojë financiarisht peshëngritësin.
