Është inauguruar Materniteti “Mbretëresha Geraldinë” pas ndryshimeve dhe rikonstruktimeve. Kryeministri Edi Rama mori pjesë në ceremoni dhe theksoi se “pastërtinë e bluzave të bardha nuk i ndyjnë dot kanalet e llumit të ryshfetit.” Ai përshkroi transformimin e ndërmarrë si të domosdoshëm dhe rrënjësor, duke nënvizuar se janë ruajtur elemente të së kaluarës si trashëgimi kulturore dhe janë krijuar hapësira të reja që e bëjnë më të lehtë dhe më cilësor shërbimin, si edhe qëndrimin e nënave dhe fëmijëve që hyjnë dhe dalin nga materniteti.
Rama tha se transformimi i shëndetësisë është i dukshëm për ato që duan të shohin, ndërsa për të tjerë mbetet objekt kritikash. Ai shprehu respekt për mjekët, infermierët dhe stafin shëndetësor, të cilët sipas tij bëjnë punë të jashtëzakonshme dhe përballen me një furi të jashtëzakonshme fjalësh që nuk e meritojnë. Rama shtoi se disa duhet të bëjnë punën, ndërsa të tjerët “t’i lehin karvanit” që shkon përpara.
Kreu i qeverisë kujtoi përmirësimet në sistemin shëndetësor krahasuar me një dekadë më parë, duke theksuar mungesën e problemeve serioze si numri i lartë i infeksioneve post-operatore që dikur detyronte që pacientët të qëndronin ditë të tëra në spital për shkak të kushteve higjenike dhe instrumenteve të vjetruara. Ai përmendi se në sistem kryhen afro 100 mijë ndërhyrje kirurgjikale, prej të cilave rreth 65–70 mijë janë në sallën e operacionit dhe 25–30 mijë të tjera janë ndërhyrje kirurgjikale jashtë sallës.
Rama vlerësoi volumet e shërbimit si dëshmi që mjekët dhe infermierët në Shqipëri i shërbejnë publikut me dinjitet, dhe theksoi objektivin për ta përmirësuar sistemin dhe “për ta pastruar tërësisht nga çdo lloj kanali ku veje-vjen llumi i ryshfetit.” Ai gjithashtu nënvizoi rritjen e vazhdueshme të pagave për punonjësit e shëndetësisë, duke u zotuar se do të vazhdojnë përpjekjet për të rritur pagat dhe për t’u kujdesur për mirëqenien e familjeve që sakrifikojnë për profesionin.
