Kryeministri Edi Rama reagoi ndaj polemikave rreth librit “The Albanian Files”, duke iu përqendruar letrës së arkitektit Reinier de Graaf, në të cilën në mënyrë ironike i sugjerohet që të bëhet “mbret” në vend që të zhvillohen zgjedhje. Në podkastin “Flasim” Rama deklaroi se teksti është keqinterpretuar dhe po përdoret si pjesë e një “inkuizicioni” ndaj botimit, teksa e përshkroi letrën si satirike dhe autoironike, në përputhje me stilin e autorit.
Rama theksoi se “The Albanian Files” është një projekt editorial i pavarur, me kontribute nga 60 arkitektë dhe studio me reputacion ndërkombëtar, dhe se çdo autor ka pasur liri të plotë për të zgjedhur tekstet, projektet dhe materialet e veta, pa ndërhyrje apo censurë. Ai tha se ka dhënë vetëm një tekst parathënesë si krenari personale dhe se botimi është konceptuar dhe kuruar nga Anneke Abhelakh. Rama pranoi se në libër mund të ketë pika të diskutueshme, por kundërshtoi sulmet që, sipas tij, e trajtojnë botimin sikur të ishte objekt i një “revolucioni kulturor” dhe nënvizoi se përfshirja e letrës së Reinier de Graaf është dëshmi e autonomisë editoriale. Ai gjithashtu deklaroi se nuk kishte parë letrën para botimit dhe se ajo është pjesë e dosjes personale të autorit, pa redaktim apo censurë.
Letra e hapur e Reinier de Graaf, datë 3 mars 2025, nis me shprehjen e mirënjohjes për mundësinë për të punuar në Shqipëri dhe admirim për arritjet e qeverisjes nën Edi Ramën, duke përmendur bashkëjetesën e grupeve fetare dhe etnike, ndarjen e kishës nga shteti, përfshirjen e të rinjve në punë, rritjen e pjesëmarrjes së grave dhe aspiratat për anëtarësim në BE, si dhe shijen e vendit për arkitekturën. Më tej autori shpreh shqetësim për të ardhmen politike dhe për pasojat që një ndryshim pushteti mund të ketë për profesionin e arkitektëve në vend. Reinier de Graaf sugjeron në mënyrë të parodizuar se do të ishte më mirë nëse zgjedhjet anulloheshin dhe nëse Rama do të vazhdonte në pushtet, madje duke ju referuar hipotekës “Mbret”, duke e paraqitur këtë si një lutje ironike për një “autokrat dashamirës me shije”. Ai mbyll letrën me shprehje mirënjohjeje dhe nënshkrimin e tij.
