Autoritetet për Sigurinë Ushqimore në Maltë sekuestruan dhe urdhëruan asgjësimin e një ngarkese me produkte ushqimore që vinte nga Shqipëria, pas konstimit të shkeljeve të rregullave të sigurisë ushqimore. Sipas Autoritetit për Sigurinë dhe Mbrojtjen Ushqimore (FSSA), ngarkesa mbërriti në Maltë me një furgon përmes tragetit nga Siçilia, pas udhëtimit nga Shqipëria.
Gjatë kontrollit inspektues u identifikuan probleme në një gamë të gjerë produktesh: mish, kos, djathë, vezë, vaj ulliri, ushqime të paketuara, pije freskuese, fasule, alkool, kripë dhe lëngje. Autoritetet raportuan se disa nga produktet ishin transportuar në temperatura të papërshtatshme, ndërsa të tjera mungonin etiketime dhe dokumentacion i nevojshëm për gjurmueshmërinë.
Si rrjedhojë, e gjithë ngarkesa u vulos menjëherë dhe FSSA urdhëroi asgjësimin e saj me qëllim mbrojtjen e shëndetit publik dhe të industrisë vendase ushqimore. Autoriteti theksoi gjithashtu se nuk ishte njoftuar paraprakisht për mbërritjen e ngarkesës, ndonëse legjislacioni i Maltës kërkon që importuesit të informojnë autoritetet të paktën 48 orë përpara futjes në vend të produkteve ushqimore, kafshëve, ushqimit për kafshë ose bimëve.
Nga njoftimi rezulton se nuk është bërë publik deri tani sasia totale e produkteve të sekuestruara. Vendimi për asgjësim u mor të mbulojë rreziqet që mund të paraqesin produktet e pasigurta për konsum dhe për të mbrojtur zinxhirin ushqimor vendas. Autoritetet lokale kanë sekuestruar ngarkesën dhe po vijojnë procedurat e nevojshme sipas legjislacionit për importin dhe sigurinë ushqimore.
