Policia greke ka goditur një bandë të trafikut të narkotikëve në ishullin Mykonos, e drejtuar nga një shtetas shqiptar. Sipas burimeve policore, kreu i grupit është Euglent Alimani, 37 vjeç, i arrestuar së bashku me bashkëjetuesen e tij, një shtetase rumune. Alimani njihej si biznesmen në ishullin kozmopolit grek. Gjatë operacionit u arrestuan gjithsej pesë anëtarë të grupit, ndërsa autoritetet vlerësojnë se fitimet e paligjshme nga aktiviteti kriminal arrijnë rreth 700 mijë euro.
Policia njofton se automjetet e një kompanie përdroheshin si për transportin e anëtarëve të organizatës, ashtu edhe për shpërndarjen e lëndëve narkotike, kryesisht në Mykonos dhe në zona me fluks të lartë turistësh. Mediat greke raportojnë se grupi kishte nisur aktivitetin kriminal në mesin e muajit prill.
Kontrollet në banesa dhe ambiente të përdorura nga organizata në Mykonos, Pire dhe Perama çuan në sekuestrimin e rreth 4.5 kilogramëve kokainë dhe lëndëve të tjera të ndaluara. Mes substancave të konfiskuara janë kokainë, një variant i përshkruar si “kokainë rozë”, kanabis, tableta me substanca farmaceutike, ketaminë dhe kërpudha halucinogjene.
Sipas autoriteteve greke, 37-vjeçari shqiptar ishte organizatori dhe koordinatori i aktivitetit kriminal. Ai dyshohet se siguronte furnitorët, menaxhonte vendet ku fshihej droga, organizonte transportin, ruajtjen dhe shpërndarjen e lëndëve narkotike, si dhe administronte një pjesë të të ardhurave të paligjshme.
Autoritetet identifikojnë edhe role të tjera brenda grupit: një 38-vjeçar konsiderohet zëvendësi i Alimanit dhe kishte përgjegjësi për ruajtjen e drogës, shpërndarjen e saj dhe menaxhimin e fitimeve; një 39-vjeçar merrej me magazinimin e narkotikëve, sigurimin e klientëve dhe ruajtjen e parave të përfituara nga shitjet. Dy anëtarët e tjerë, një 25-vjeçar dhe një grua 38-vjeçare, dyshohen se kishin role në ruajtjen dhe shpërndarjen e drogës, si dhe në mbikëqyrjen e vendeve ku fshiheshin lëndët narkotike.
Hetimet dhe sekuestrimet janë kryer nga struktura policore greke, sipas njoftimeve zyrtare, ndërsa hetimet për origjinën e sasisë së drogës dhe rrjetin e furnizimit vazhdojnë.
