Me ftesë të studentëve të Kolegjit të Europës, ish-presidenti francez François Hollande vizitoi Tiranën. Në cilësinë e anëtari të Komisionit për Punët e Jashtme në Asamblenë Kombëtare të Francës, ai u takua me kryeministrin Edi Rama dhe drejtues të institucioneve shqiptare, ku fokusi i diskutimeve ishte procesi i Shqipërisë drejt anëtarësimit të plotë në BE. Para largimit dha një intervistë ekskluzive për Top Channel dhe gazetar Muhamed Veliu, duke iu përgjigjur pyetjeve për aspiratën europiane të Shqipërisë dhe rolin mbështetës të Francës, ndërsa theksoi se anëtarësimi duhet të jetë i bazuar në meritë.
Hollande kujtoi se gjatë mandatit të tij Shqipëria mori statusin e vendit kandidat dhe se prej asaj kohe janë hapur kapitujt e anëtarësimit. Ai e konsideron të arsyeshëm parashikimin për anëtarësim deri në vitin 2030, por pranoi se ka ende elemente që duhen rregulluar dhe ratifikime që duhet të kryhen. Procedurat evropiane, megjithë ngadalësinë e tyre, sipas tij do ta ndihmojnë Shqipërinë të ketë sukses jo vetëm për t’u futur në BE, por edhe për të qenë një faktor i rëndësishëm brenda saj.
Për iniciativën franko-gjermane të një plani për integrim gradual dhe të strukturuar, Hollande shprehu mbështetje. Ai vlerësoi se kjo mënyrë lejon vendet kandidate që janë gati të marrin pjesë në mbledhje të fushave ku vendosen kushtet për hyrje, duke përshpejtuar përfshirjen pa hequr kushtet e reformat e meritat. Sidoqoftë, theksoi se kjo nuk duhet të shihet si një shtyrje tjetër të aderimit, por si një proces ku nuk ka dyshime mbi arritjen e pranimit — veçanërisht për Shqipërinë dhe Malin e Zi; për Ukrainën duhet plotësimi i të gjitha kushteve dhe afatet janë të ndryshme.
Hollande vlerësoi se agresioni rus kundër Ukrainës ka përshpejtuar dëshirën e Komisionit Evropian për përgatitjen e Ukrainës dhe Moldavisë dhe ka dhënë një shtysë edhe vendeve të Ballkanit, sidomos Shqipërisë dhe Malit të Zi. Ai argumentoi se Ballkani Perëndimor duhet të marrë vendin e tij në BE për të shmangur interferencat e huaja dhe për të forcuar sigurinë evropiane. Për lidhjet mes Francës dhe Shqipërisë në vitet e fundit, Hollande u shpreh i kënaqur që Presidenti Macron vizitoi Tiranën dy herë, duke theksuar lidhjet kulturore dhe nevojën për të mbrojtur pluralizmin kundër djathtave ekstreme populiste; ai beson se pranimi i Shqipërisë në BE do të forcojë rrymën e demokracisë.
