Shërbimet e Komisariatit të Policisë Kurbin finalizuan operacionin e koduar “Vigjilenca 3”, në kuadër të kontrolleve intensive që po zhvillohen në të gjithë territorin e qarkut Lezhë për parandalimin, evidentimin dhe goditjen e rasteve të kultivimit të bimëve narkotike. Operacioni u bazua edhe në informacionet e siguruara në rrugë operative dhe përfundoi me goditjen e një rasti të ri të kultivimit të bimëve narkotike në fshatin Skuraj.
Gjatë ndërhyrjes, policia konstatoi në terren bimë të dyshuara narkotike Cannabis sativa, të cilat u asgjësuan në vend përmes djegies. Dy persona u kapën në flagrancë në vendin ku ishin kultivuar bimët dhe u arrestuan si të dyshuar si bashkëpunëtorë në këtë veprimtari kriminale. Të arrestuarit identifikohen me inicialet A. H., 25 vjeç, dhe S. T., 19 vjeç, banues në Fushë Milot, Kurbin.
Në cilësinë e provës materiale u sekuestrua një automjet dhe sende të tjera që do t’i shërbejnë hetimit për dokumentimin e plotë ligjor të rastit. Materialet procedurale të krijuara pas operacionit iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme, sipas kompetencave ligjore.
Autoritetet policore njoftuan se kontrollet antikanabis do të vijojnë në të gjithë territorin e qarkut Lezhë, si pjesë e masave intensive që synojnë parandalimin dhe evidentimin e rasteve të kultivimit të bimëve narkotike. Operacioni në Skuraj përfaqëson një ndër ndërhyrjet e rradhës të strukturave vendore të policisë në fushën e luftës kundër kultivimit dhe shpërndarjes së lëndëve narkotike, duke përfshirë veprime operative, ndërhyrje në terren, asgjësim të bimëve të konstatuara dhe procedim penal kundër të dyshuarve.
