Kampi i kombëtares së Brazilit po përballet me trazira jashtë fushës gjatë këtij Kampionati Botëror pas një lajmi të përhapur nga media braziliane Metropoles, i cili merr përmasa virale pas deklaratave të ish-futbollistit Vampetës në podkastin “Red Cast”. Vampeta deklaroi se sulmuesi i Barcelonës po përjeton “një problem serioz familjar, krahas vështirësive financiare” dhe se ai po lutet të transferohet te Al-Hilal për t’i zgjidhur këto çështje, duke thënë se informacioni i kishte ardhur “nga njerëz shumë të afërt me situatën te Barcelona.”
Reagimet nga kampi i lojtarit ishin të menjëhershme dhe të forta. Kushëriri i Raphinhas, Igor Padilha, iu drejtua publikisht Vampetës: “Do të duhet t’i shpjegosh këto gënjeshtra, miku im.” Menaxherët e futbollistit u shprehën për të përditshmen Mundo Deportivo se Raphinha është i lumtur në Barcelonë dhe i fokusuar te kombëtarja. Ata gjithashtu thanë se familja e tij — bashkëshortja, djali, prindërit dhe vëllai — ndodhen së bashku me të në Shtetet e Bashkuara. Bashkëshortja, Natalia Belloli, reagoi në Instagram me një mini-dokumentar, ku u bëri thirrje personave me ndikim të përdorin platformat e tyre me përgjegjësi.
Nga ana faktike, e vetmja gjë e konfirmuar është lëndimi sportiv i Raphinhas. Ai pësoi një dëmtim të kofshës së djathtë (hamstring) gjatë fitores 3-0 ndaj Haitit. Mesfushori Lucas Paqueta pranoi se lojtari është “pak i dëshpëruar” dhe shprehu shqetësimin për rëndësinë e tij për ekipin: “Shpresojmë të mos jetë diçka e rëndë sepse është një lojtar shumë i rëndësishëm për ne.” Stafi mjekësor i Brazilit nuk e ka përjashtuar Raphinhën nga turneu; dëmtimi konsiderohet “i vogël” dhe me një protokoll intensiv rehabilitimi pritet që ai të kthehet pas rreth dy javësh për të ndihmuar ekipin në fazat e mëvonshme. E sigurt është mungesa e tij në sfidën e sotme kundër Skocisë.
Top Channel.
