Carlo Ancelotti njoftoi se Neymar është në gjendje të luajë në ndeshjen e radhës të Brazilit, që zhvillohet në orët e para të mëngjesit të së enjtes kundër Skocisë. Ky do të jetë Botërori i katërt për sulmuesin 34-vjeçar, pas pjesëmarrjeve në 2014, 2018 dhe 2022.
Historikun e Neymarit në fazat finale të Kupës së Botës e shoqërojnë edhe episode dramatike. Në çerekfinalen e Botërorit 2014 në Brazil, kolumbiani Camilo Zúñiga i shkaktoi një dëmtim me një goditje me gju në shpinë që rezultoi në frakturë vertebre. Dëmtimi e nxorri jashtë turneut Neymarin, i cili kishte shënuar 4 gola dhe dhënë 1 asist për Brazilin. Futbollisti vetë deklaroi se “nëse goditja do të kishte qenë dy centimetra më në qendër, mund të kisha mbetur në karrocë invalidësh”. Mungesa e tij pati ndikim te skuadra; në gjysmëfinale Brazili pësoi humbjen 7-1 ndaj Gjermanisë.
Në Botërorin e Rusisë 2018, Brazili u eliminuar në çerekfinale nga Belgjika (1-2). Neymar, atëherë lojtar i PSG-së, shënoi dy gola gjatë turneut: në fitoren 2-0 ndaj Kamerunit dhe në suksesin 2-0 kundër Meksikës.
Në Katar 2022, Brazili u eleminua në çerekfinale nga Kroacia pas një serie penalltisht të fituar nga kroatët 4-2. Neymar i dha Brazilit avantazhin me një gol në minutën 105+1, ndërsa Bruno Petković barazoi në minutën e 117-të; në serinë e penalltive Kroacia doli fituese. Në atë Botëror Neymar shënoi, përveç golit ndaj Dominik Livakovićit në ndeshjen kundër Kroacisë, edhe një gol në fitoren 4-1 ndaj Koresë së Jugut.
Ndeshja e parë e Neymarit në një Botëror ishte pikërisht kundër Kroacisë, më 12 qershor 2014 në São Paulo, ku sulmuesi i atëhershëm i Barcelonës shënoi dy gola në fitoren 3-1 të Brazilit; ajo Kroaci kishte në radhët e saj Luka Modrić dhe Ivan Rakitić, i cili atë verë u transferua te Barcelona.
Më vonë, Neymar dhe Rakitić do të fitonin së bashku Ligën e Kampionëve 2014-15 me Barcelonën nën drejtimin e Luis Enrique, në finalen 3-1 kundër Juventusit në Olympiastadion të Berlinit, ku Rakitić shënoi golin e parë, Luis Suárez të dytin dhe Neymar të tretin.
