Policia e Shtetit njofton emërime dhe lëvizje në strukturat drejtuese në nivel qendror dhe vendor. Pas përfundimit të procesit të konkurrimit për Drejtor Qarku, disa drejtues janë emëruar në krye të drejtorive vendore të policisë, ndërsa janë kryer edhe ndryshime në komisariate dhe poste drejtuese në disa qarqe.
Drejtues Ardrit Elmazi, i shpallur fitues në konkurimin për Drejtor Qarku, emërohet Drejtor i Drejtorisë Vendore të Policisë Kukës. Drejtues Dashamir Spaho, gjithashtu fitues i konkurrimit për Drejtor Qarku, emërohet Drejtor i Drejtorisë Vendore të Policisë Shkodër. Drejtuesi i Parë Xhevahir Karaj, pas shpalljes fitues në të njëjtin proces, emërohet Drejtor i Drejtorisë Vendore të Policisë Dibër.
Drejtues Armir Gjikolaj, i cili ka mbajtur detyrën e Drejtorit të Drejtorisë Vendore të Policisë Dibër dhe ka dhënë dorëheqje nga detyra me kërkesë të tij, emërohet në detyrën Drejtor i Qendrës së Mbyllur të të Huajve. Në Drejtorinë Vendore të Policisë Durrës, Kryekomisar Idris Daulle emërohet në detyrën Zëvendësdrejtor për Sigurinë Publike.
Në Drejtorinë Vendore të Policisë Shkodër janë emëruar: Kryekomisar Erion Duma si Shef i Komisariatit të Policisë Shkodër dhe Komisar Klodjan Çeka si Shef i Komisariatit të Policisë Malësi e Madhe. Në Drejtorinë Vendore të Policisë Lezhë, Komisar Sokol Myrta emërohet Shef i Komisariatit të Policisë Mirditë.
Njoftimi thekson se pas konkurrimit për Drejtor Qarku janë bërë emërime në krye të drejtorive vendore dhe kanë ndodhur ndryshime në nivele të tjera drejtuese dhe në komisariate në disa qarqe të vendit.
