Kandidati i krahut të djathtë Abelardo de la Espriella rezulton fitues ngushtë i zgjedhjeve presidenciale në Kolumbi, sipas numërimit paraprak të votave, duke shënuar një ndryshim të rëndësishëm në drejtimin politik të vendit. Me më shumë se 99 për qind të votave të numëruara, de la Espriella ka marrë rreth 49.7 për qind të votave, ndërsa rival i tij i majtë, Iván Cepeda, ka mbledhur 48.7 për qind. Rezultatet paraprake tregojnë një avantazh të ngushtë për kandidatin e mbështetur nga presidenti amerikan Donald Trump.
Në fjalimin para mbështetësve në Barranquilla, de la Espriella deklaroi se vendi po hyn në një epokë të re dhe premtoi se do të qeverisë për të gjithë kolumbianët, duke u zotuar të respektojë Kushtetutën e vitit 1991. Ai tha: “Sonte fillon një histori e re për kombin tonë. Do të qeveris për të gjithë kolumbianët, si për ata që votuan për mua, ashtu edhe për ata që mbështetën kandidatin tjetër”.
Iván Cepeda nuk ka pranuar ende humbjen dhe ka vënë në dukje se numërimi paraprak nuk përbën rezultat zyrtar. Ai deklaroi se do të presë përfundimin e procesit të verifikimit dhe shpalljen zyrtare të rezultatit përpara se të njohë fituesin.
Fitorja e mundshme e de la Espriellës pritet të sjellë ndryshime në politikat e sigurisë të Kolumbisë. Gjatë fushatës, ai është zotuar për një qasje më të ashpër ndaj grupeve të armatosura ilegale, trafikut të drogës dhe krimit të organizuar.
Mbështetësit e tij festuan rezultatin në Barranquilla me flamuj kombëtarë, muzikë dhe fishekzjarrë. Shumë prej tyre mbanin kapele me sloganin “Ta bëjmë Kolumbinë të madhe përsëri”, një referencë ndaj sloganit politik të Donald Trump.
Pas publikimit të rezultateve paraprake, Trump reagoi në rrjetin e tij social Truth Social duke shkruar: “Ai fitoi, MADHËSHTi”.
Numërimi ende konsiderohet paraprak dhe rezultatet zyrtare priten pas përfundimit të procesit të verifikimit.
