Të paktën 23 persona u vranë në Libanin jugor nga sulmet ajrore izraelite, më pak se 24 orë pas njoftimit për një armëpushim të ri mes Izraelit dhe Hezbollahit. Autoritetet lokale thanë se 16 persona humbën jetën në distriktin Nabatieh dhe shtatë të tjerë në rajonin e Saidas, ndërsa dhjetëra të tjerë mbetën të plagosur. Mediat shtetërore libaneze raportuan se mes viktimave ishte edhe një familje me katër anëtarë — prindërit dhe dy fëmijët e tyre — që u vranë në qytetin Barish.
Ushtria izraelite deklaroi se kishte goditur “dhjetra objektiva të Hezbollahut” në jug të Libanit, duke e përshkruar operacionin si përgjigje ndaj mbi 50 raketave dhe predhave të lëshuara nga grupi shiit ndaj forcave izraelite në zonë. Nga ana tjetër, Hezbollah ka refuzuar armëpushimin e shpallur nga zyrtarët amerikanë; një zyrtar i grupit tha se organizata nuk e njeh marrëveshjen dhe kundërshton çdo operacion ushtarak izraelit brenda territorit libanez.
Zyrtari i lartë i Hezbollahut, Hassan Fadlallah, deklaroi se grupi ka të drejtë të reagojë ndaj sulmeve izraelite dhe kërkoi që Izraeli të respektojë plotësisht armëpushimin, të mos ndërmarrë sulme të reja dhe të mos zgjerojë praninë e tij ushtarake në Libanin jugor. Shtetet e Bashkuara shprehën shqetësim për vazhdimin e operacioneve ushtarake në Liban, duke paralajmëruar se tensionet mund të rrezikojnë marrëveshjen e paqes së arritur së fundmi me Iranin. Sipas raportimeve, i dërguari amerikan Steve Witkoff pritet të zhvillojë bisedime me zyrtarë iranianë në Zvicër për të konsoliduar marrëveshjen.
Pavarësisht armëpushimit të shpallur, përplasjet vazhdojnë në terren. Ministria libaneze e Shëndetësisë raportoi se vetëm të premten 47 persona u vranë dhe 97 të tjerë u plagosën nga sulmet izraelite, ndërsa ushtria izraelite njoftoi se katër ushtarë të saj humbën jetën. Konflikti po shkakton pasoja të rënda humanitare në Libanin jugor, ku qindra mijëra persona mbeten të zhvendosur dhe shumë komunitete janë shkatërruar nga luftimet e muajve të fundit.
