Kancelari gjerman Friedrich Merz përshëndeti nënshkrimin e marrëveshjes SHBA–Iran dhe armëpushimin që garanton kalimin e sigurt nëpër Ngushticën e Hormuzit. Ai njoftoi se qeveria gjermane do të sqarojë se si mund të ndihmojë në këtë përpjekje, për shembull duke ofruar anije për pastrimin e minave detare ose mbështetje ushtarake për masat e dakorduara. Merz theksoi se para nisjes së një misioni të tillë, forcat e armatosura gjermane kanë nevojë për një mandat ose ndonjë bazë tjetër ligjore nga Bundestagu, dhe se çështja do të diskutohet gjerësisht dhe me durim.
Kryeministri i Luksemburgut, Luc Frieden, gjithashtu përshëndeti çdo marrëveshje që çon drejt paqes, por shtoi se ende ka pjesë që duhen përfunduar. Ai theksoi rëndësinë globale të Ngushticës së Hormuzit dhe vullnetin e Luksemburgut për të ndihmuar në sigurimin e paqes dhe stabilitetit në atë zonë.
Në prag të vendimeve të mëtejshme, Marina gjermane ka dislokuar dy anije në Detin e Kuq për një mision të mundshëm në Ngushticën e Hormuzit. Sipas Ministrisë së Mbrojtjes, anija për pastrimin e minave Fulda dhe anija e furnizimit Mosel kanë kaluar Kanalin e Suezit dhe po i drejtohen portit të Xhibutit, ku pritet të stacionohen për një mision të mundshëm. Ministri i Mbrojtjes Boris Pistorius tha, gjatë një takimi të ministrave të mbrojtjes të NATO-s në Bruksel, se Gjermania dëshiron të reagojë shpejt nëse lind nevoja. Anijet do të jenë pjesë e një misioni të mundshëm për sigurimin e lirisë së lundrimit dhe do të mbështeten nga sisteme çminimi, palombarë dhe forca mbrojtëse.
Pistorius theksoi se ende është e paqartë nëse do të ketë një mision për çminimin e Ngushticës, pasi shumë varet nga ecuria e bisedimeve mes SHBA-së dhe Iranit. Sipas tij, për dërgimin e anijeve nuk kërkohet mandat nga Bundestagu, pasi ky veprim bëhet në kuadër të kontributit gjerman në misionin detar të BE-së “Aspides”. Në bordet e dy anijeve ndodhen rreth 140 ushtarë. /DW
