Guvernatori i Kalifornisë, demokrati Gavin Newsom — i konsideruar kandidat me shanse për presidencën e ardhshme të SHBA-së — po përballet me hetime nga autoritetet federale që përfshijnë edhe anëtarë të familjes së tij. Newsom akuzon Presidentin Donald Trump se po përdor Departamentin e Drejtësisë për të nisur një hetim me motive politike kundër tij dhe gruas së tij. Në një video të postuar në platformën X, 58-vjeçari thotë se “Ai po më ndjek sepse po mendoj të kandidoj për President” dhe i drejtohet Trump-it: “Ju mund të kërkoni dokumentet e mia. Ju mund të bëni hetime kundërmeje. Ju mund të më bini në qafë. Vendoseni emrin tim në çdo listë armiqsh që keni. Por lëreni gruan dhe familjen time jashtë hakmarrjes suaj personale.”
Sipas raportimeve, zyrtarë federalë kanë vizituar anëtarë të familjes, miq dhe ish-kolegë të Newsom-it për të kërkuar dokumente të vjetra; Newsom thotë se kjo po bëhet “për t’u përpjekur të gjejnë një krim” dhe jo sepse është zbuluar një vepër penale. New York Times raporton se po zhvillohen disa hetime, përfshirë një që fokusohet në financat e bashkëshortes së tij, Jennifer Siebel Newsom. Shtëpia e Bardhë dhe Departamenti i Drejtësisë nuk kanë reaguar ndaj kërkesave për koment.
Trump dhe Newsom kanë një marrëdhënie konfliktuale publike: Presidenti më parë deklaroi se do të mbështeste arrestimin e guvernatorit, duke akuzuar Newsom për pengim të autoriteteve të imigracionit dhe duke thënë më vonë se “krimi i tij kryesor” ishte se kishte kandiduar për guvernator dhe se kishte bërë “një punë kaq të keqe.”
Opozita amerikane akuzon Presidentin se po përdor Departamentin e Drejtësisë si mjet hakmarrjeje kundër kundërshtarëve politikë, duke shkelur ndarjen e pushteteve. Që nga rikthimi i Trump-it në Shtëpinë e Bardhë në janar 2025, Departamenti i Drejtësisë ka nisur procedura penale ose hetime kundër disa figurave të njohura, përfshirë ish-drejtorin e FBI-së James Comey, prokuroren e Nju Jorkut Letitia James dhe ish-këshilltarin e sigurisë kombëtare John Bolton, si dhe zyrtarë që kishin konstatuar ndërhyrjen ruse në zgjedhjet e 2016. Në janar, Jerome Powell bëri publik se ishte subjekt i një hetimi penal; në prill, prokurorja federale Jeanine Pirro e mbylli çështjen pa veprime të mëtejshme.
