Situata në Ukrainë mbetet e tensionuar pas sulmeve të reja të regjistruara gjatë natës si në territorin ukrainas, ashtu edhe në Rusi. Administrata Ushtarake e Kievit dhe Forcat Ajrore të Ukrainës lëshuan alarm ajror për disa rajone, duke paralajmëruar për rrezikun e përdorimit të mundshëm të armëve balistike nga Rusia.
Pak më vonë kryeqyteti ukrainas, Kievi, u godit nga një sulm raketor; raportimet lokale nënvizojnë se u dëgjua zhurma e një rakete e ndjekur nga dy shpërthime të fuqishme. Pas aktivizimit të alarmit, banorët dolën shpejt në rrugë dhe u drejtuan drejt strehimoreve për t’u mbrojtur nga sulmet.
Përgjigjja e Ukrainës u pasqyrua në raportimet ruse se disa dronë ukrainas arritën të godasin një rafineri nafte në Moskë. Lajmin e konfirmoi kryebashkiaku i Moskës, Sergey Sobyanin, i cili deklaroi se mbrojtja ajrore ruse po përballej me një sulm të gjerë me dronë. Në një postim në aplikacionin e mesazheve Max, Sobyanin njoftoi se “mbronja ajrore vazhdon të zmbrapsë një sulm në shkallë të gjerë” dhe se po merren masa për të menaxhuar pasojat. Sipas tij, sistemet ruse të mbrojtjes ajrore kanë shkatërruar të paktën 52 dronë që po fluturonin drejt kryeqytetit.
Sulmet e raportuara gjatë natës ilustrojnë përshkallëzimin e konfliktit mes Rusisë dhe Ukrainës, teksa të dyja palët po intensifikojnë operacionet ushtarake. Deri më tani nuk ka informacione zyrtare për viktima apo dëme të mëdha materiale nga incidentet e natës; autoritetet në të dy vendet po vazhdojnë vlerësimin e situatës në terren dhe marrjen e masave për menaxhimin e pasojave. Top Channel.
