Një skandal i rëndë ka tronditur Kupën e Botës 2026, pas arrestimit të sulmuesit 23-vjeçar të Bregut të Fildishtë, Elye Wahi. Lojtari, i cili luan për klubin Nice në Francë, është ndaluar nga policia franceze nën akuzat për mashtrim të organizuar dhe korrupsion sportiv.
Autoritetet e lidhin të akuzuarën me një incident specifik të datës 17 maj, në ndeshjen e Nice kundër Metz, ku Wahi dyshohet se ka marrë qëllimisht një karton të verdhë. Sipas hetimeve, ky karton kishte për qëllim të favorizonte bastet e paligjshme që dyshohen të jenë vendosur më parë. Pas hetimeve paraprake, lojtari u prangos në Marsejë më 29 maj, por u lirua pas marrjes në pyetje nga policia.
Hetimi ndaj Wahi-t mbetet i hapur dhe çështja vazhdon nën hetim penal. Megjithë akuzat dhe ndalimin e mëparshëm, Wahi udhëtoi me kombëtaren e Bregut të Fildishtë për në fazën e turneut dhe u aktivizua titullar në ndeshjen e fundit, ku skuadra e tij arriti fitoren 1-0 kundër Ekuadorit. Roli i tij në këtë ndeshje dhe prezenca në përfaqësuese tregojnë se procedurat disiplinore brenda strukturave sportive apo vendimet e përkohshme nuk kanë çuar ende në përjashtim ose pezullim të menjëhershëm nga loja.
Megjithatë, e ardhmja e tij në Kupën e Botës është e pasigurt. Ndeshjet e radhës të turneut do të zhvillohen në Kanada, dhe autoritetet kanadeze kanë rregulla të rrepta lidhur me hyrjen në territor për persona që janë nën hetim penal. Për këtë arsye, ekziston mundësia që Kanadaja të bllokojë hyrjen e Wahi-t, çka do të pengonte pjesëmarrjen e tij në ndeshjet që zhvillohen atje.
Rasti është duke u ndjekur nga autoritetet ligjore dhe sportivë, ndërsa hetimet për mashtrim të organizuar dhe korrupsion sportiv vazhdojnë. (Burimi: Top Channel)
