Real Madridi njoftoi në faqen e tij zyrtare se ka paraqitur në Komitetin e Disiplinës së UEFA-s një raport lidhur me të ashtuquajturën “Çështja Negreira”, veprim për të cilin presidenti Florentino Pérez kishte folur gjatë fushatës zgjedhore. Në dokument, klubi denoncon se pagesat e kryera nga FC Barcelona ndaj ish-zëvendëspresidentit të Komitetit Teknik të Arbitrave të Federatës Mbretërore Spanjolle, José María Enríquez Negreira, përmes strukturave të ndryshme shoqërore, paraqesin “një rrezik sistemik me gravitet maksimal për integritetin e garave”.
Real Madridi bën të ditur se në dispozicion ka prova të rëndësishme që, sipas tij, forcojnë indiciet fillestare për ekzistencën e pagesave të zgjatura në kohë, të paqarta dhe pa justifikim të verifikueshëm. Klubi argumenton se këto fakte nënkuptojnë ekzistencën e një strukture ndikimi të padrejtë mbi trupën arbitrale, çka është e papajtueshme me parimet e barazisë konkurruese, neutralitetit, paanshmërisë dhe paparashikueshmërisë së rezultatit sportiv.
Për këto arsye, Real Madridi i kërkon UEFA-s të riaktivizojë menjëherë procedurën disiplinore që kishte hapur më parë, duke konsideruar të papranueshme që çështja të jetë zvarritur në kohë. Klubi thekson se vazhdimësia e mosveprimit cenon seriozisht besueshmërinë e futbollit, të institucioneve dhe drejtuesve të tij, dhe për këtë arsye kërkon një reagim të fortë, shembullor dhe të menjëhershëm në aspektin sportiv.
Në komunikatë, Madridi nënvizon se masat disiplinore duhet të merren pavarësisht ecurisë së procedimeve penale në zhvillim. Klubi i kërkon UEFA-s, në ushtrim të kompetencës së saj autonome, të ndërmarrë masat disiplinore dhe rikuperuese të nevojshme për të garantuar integritetin, transparencën dhe funksionimin e duhur të garave, pa zëvendësuar funksionin e organeve gjyqësore të shtetit dhe pa paraprirë një vlerësim penal të fakteve. Real Madridi njofton gjithashtu se, si palë e përfshirë në procedurën penale si akuzues privat, do të vazhdojë të ushtrojë veprimet që i takojnë në çdo fazë të procesit.
