Entuziazmi i tifozëve gjermanë për kombëtaren ka shkaktuar mjaft problem për Adidas: shkronja ‘V’ për personalizimin e fanelave zyrtare është shitur e gjitha. Për shkak të kërkesës së lartë për fanelat me mbiemrat Havertz, Undav dhe Pavlovic, tifozët nuk mund të porosisin për momentin online fanelat origjinale me këto emra. Lajmi u publikua fillimisht nga Bild dhe u konfirmua nga Adidas, që tha se kërkesat e shumta për personalizime të dedikuara kanë shkaktuar një mungesë të përkohshme të shkronjës ‘V’, por se problemi pritet të zgjidhet shpejt.
Shitjet e fanelave gjatë eventeve të mëdha futbollistike përbëjnë një burim të rëndësishëm të ardhurash për prodhuesit e artikujve sportivë. Për Botërorin 2026 në SHBA, Kanada dhe Meksikë, Adidas furnizon me materiale teknike 14 nga 48 skuadrat pjesëmarrëse dhe vlerëson të ardhura të lidhura direkt me turneun prej rreth 1 miliard euros. Kompania nuk specifikoi sesa zënë shitjet e fanelave brenda kësaj shifre. Sipas Adidas, fanela blu e Gjermanisë për ndeshjet në transfertë po shitet më shumë se pritej; kërkesa u rrit veçanërisht pas zbulimit të skuadrës përfundimtare dhe me nisjen e turneut. Në Gjermani aktualisht janë dy versione të fanelës zyrtare: një me çmim 100 euro dhe një premium 150 euro, çmime që janë në linjë me tregjet e tjera.
Edhe Puma, që furnizon 11 skuadra pjesëmarrëse të Botërorit, deklaron se është e kënaqur me ecurinë e shitjeve. Fanelat e Portugalisë po shiten shumë mirë, ndërsa rezultate të mira raportohet të jenë edhe për Zelanden e Re, Marokun, Senegalin dhe Bregun e Fildishtë. Puma thekson se synon më tepër se shifra të menjëhershme; objektivi është përforcimi i vizibilitetit të markës dhe konsolidimi i raportit me tifozët për një afat të mesëm dhe të gjatë.
Një tjetër detaj: ky Botëror 2026 do të jetë i fundit që Gjermania do të luajë me fanelat e markës Adidas; nga 2027 Federata Gjermane e Futbollit do të kalojë zyrtarisht te Nike, duke mbyllur një partneritet më shumë se 70-vjeçar.
