Një incident detar mes forcave ruse dhe një anijeje britanike me vela u regjistrua të martën në Kanalin Anglez, ku fregata ruse Admiral Grigorovich qëlloi me armë zjarri paralajmëruese, pas një afrimi që Moska e përshkroi si të rrezikshëm. Ngjarja ndodhi rreth mesditës, rreth 20 milje detare në jug të Ishullit Wight, në ujëra ndërkombëtare, sipas Ministrisë ruse të Mbrojtjes. Autoritetet ruse thanë se fregata vuri re një anije me flamur britanik që po lëvizte me motor dhe që, sipas tyre, po ndiqte një kurs që do ta afronte rrezikshëm me luftanijen.
Moskë pretendon se ekuipazhi i fregatës tentoi të komunikonte fillimisht me velierën përmes radios dhe me sinjale zanore e vizuale paralajmëruese, por anija britanike vijoi lëvizjen drejt fregatës. Kur distanca u reduktua në rreth 150 metra, komandanti i Admiral Grigorovich urdhëroi të qëlloheshin të shtëna paralajmëruese përpara velierës. Ministria ruse deklaroi se pas të shtënave anija britanike ndryshoi menjëherë drejtimin dhe u largua nga zona, dhe se fregata veproi në përputhje me rregullat ndërkombëtare të lundrimit dhe mori të gjitha masat për të shmangur incidentin.
Ministria britanike e Mbrojtjes konfirmoi se anija ruse ka qëlluar me armë zjarri pas përpjekjeve për komunikim, por theksoi se të shtënat nuk ishin drejtuar ndaj velierës dhe se zjarri kishte për qëllim parandalimin e një përplasjeje të mundshme. Në momentin e incidentit fregatën ruse po monitoronte anija patrulluese e Marinës Mbretërore HMS Mersey. Pas ngjarjes, një mjet i HMS Mersey iu afrua velierës për të verifikuar gjendjen e ekuipazhit dhe për të mbledhur informacione; autoritetet britanike njoftuan se nuk pati të lënduar apo dëme materiale dhe se anija me vela vazhdoi udhëtimin normalisht.
Ngjarja ndodhi pak ditë pas një operacioni të Marinës Mbretërore kundër cisternës Smyrtos, e cila është nën sanksione për lidhje të dyshuara me një “flotë në hije” ruse; megjithatë, Londra tha se hetimet paraprake nuk kanë gjetur lidhje mes dy episodeve dhe e konsiderojnë incidentin me fregatën ruse si një rast të izoluar.
