Një bombardues strategjik B-52 Stratofortress u rrëzua pak minuta pas ngritjes nga Baza Ajrore Edwards, në verilindje të Los Anxhelosit, duke shkaktuar vdekjen e tetë anëtarëve të ekuipazhit. Sipas informacioneve paraprake, avioni po kryente një fluturim rutinë testimi kur humbi lartësinë dhe u rrëzua menjëherë pas nisjes. Autoritetet amerikane e kanë cilësuar ngjarjen si një aksident tragjik, ndërsa operacioni në zonë është kthyer tashmë në një mision rikuperimi. “Ishte një aksident tragjik pa asnjë mundësi mbijetese”, deklaroi koloneli James Hayes gjatë një konference për shtyp.
Emergjenca reagoi menjëherë në vendngjarje dhe hetimet u nisën menjëherë për të përcaktuar shkaqet e rrëzimit. Administrata e Bazës Ajrore Edwards nuk ka dhënë informacione shtesë dhe deri tani nuk janë bërë publike detaje të tjera mbi misionin që po kryente bombarduesi apo rrethanat e sakta që çuan në aksident. Ekspertët po analizojnë gjendjen teknike të avionit dhe të dhënat e regjistruara gjatë fluturimit, ndërsa hetimet vazhdojnë.
Sipas një postimi në rrjetin X, rrëzimi ndodhi rreth orës 11:20 lokale, dhe burime të tjera në rrjet raportuan se ky ishte hera e parë që një B-52 rrëzohet që nga aksidenti në Guam në vitin 2008. Autoritetet pritet të publikojnë më shumë informacione në orët dhe ditët në vijim.
B-52 Stratofortress konsiderohet një nga avionët më ikonikë të Forcave Ajrore të Shteteve të Bashkuara. Edhe pse është projektuar dekada më parë, ai vazhdon të jetë pjesë e flotës aktive amerikane dhe luan një rol në strategjinë e parandalimit ushtarak. Bombarduesi ka marrë pjesë në operacione të shumta ushtarake që nga periudha e Luftës së Ftohtë e deri në ditët e sotme, duke u konsideruar një nga avionët më jetëgjatë në historinë e aviacionit ushtarak amerikan.
Hetimet për shkaqet e aksidentit vazhdojnë, dhe autoritetet do të japin njoftime shtesë teksa të dalin rezultatet e analizave teknike dhe të të dhënave të fluturimit.
