Ministrja e Shëndetësisë dhe Mirëqenies Sociale, Evis Sala, mori pjesë në tryezën e organizuar nga Dhoma Amerikane e Tregtisë ku prezantoi prioritetet strategjike të ministrisë dhe reformat kryesore në sistemin shëndetësor. Ajo njoftoi nisjen e procesit të konsultimit për Vendimin e Këshillit të Ministrave për krijimin e Institutit Onkologjik Kombëtar, i cili do të funksionojë si strukturë universitare, njësi kërkimore-shkencore, qendër reference kombëtare për sëmundjet tumorale dhe koordinatori i Rrjetit Kombëtar të Onkologjisë. Krijimi i institutit synohet të vendosë baza për një sistem të integruar dhe të standardizuar të kujdesit onkologjik në vend.
Paralelisht, po ndërtohet Rrjeti Kombëtar i Onkologjisë për të siguruar akses të koordinuar dhe shërbime në përputhje me të njëjtat standarde në të gjithë territorin. Ministrja prezantoi gjithashtu Listën e Barnave të Rimbursueshme 2026, që përfshin 55 barna alternative tregtare dhe 27 principe aktive të reja, duke zgjeruar opsionet e trajtimit për pacientët me sëmundje tumorale, hematologjike, diabet, sklerozë multiple, sëmundje kardiovaskulare, respiratore dhe patologji të tjera me impakt të lartë shëndetësor. Në fushën e onkologjisë, përfshirja e terapive inovative synon rritjen e aksesit në barna moderne; për 2026 parashikohen 1.5 miliardë lekë shtesë për barna onkologjike inovative, një rritje prej 16% të buxhetit total për barna krahasuar me 2025.
MSHMS po investon në zgjerimin e kapaciteteve diagnostikuese dhe trajtuese: tashmë është në funksion Akseleratori i tretë Linear dhe synohet instalimi i të katërtit brenda vitit. Në bashkëpunim me Agjencinë Ndërkombëtare të Energjisë Atomike pritet ofrimi i shërbimeve PET Scanner dhe Brakiterapi gjatë vitit.
Si pjesë të reformave, ministrja prezantoi projektligjin “Për produktet mjekësore për përdorim në njerëz”, që synon harmonizimin e legjislacionit shqiptar me Direktivën 2001/83 të BE-së dhe krijimin e një sistemi rregullator modern, transparent dhe të parashikueshëm. Projektligji do i nënshtrohet konsultimit publik dhe synon të rrisë sigurinë, cilësinë dhe aksesin në terapi inovative, të forcojë farmakovigjilencën dhe kapacitetet e Agjencisë Kombëtare të Barnave dhe Pajisjeve Mjekësore.
Ministrja njoftoi avancimin e digjitalizimit të sistemit shëndetësor, me funksionimin elektronik të spitaleve publike nga 1 gushti, drejt një sistemi të integruar për koordinimin e kujdesit, referimet dhe përdorimin e të dhënave. Sala vlerësoi rolin e komunitetit të biznesit dhe industrisë, duke theksuar nevojën për dialog të vazhdueshëm për ndërtimin e një sistemi shëndetësor të harmonizuar me standardet e BE-së.
