Kryeministri Edi Rama reagoi ndaj debateve dhe akuzave për projektet e investimeve në Ishullin e Sazanit dhe në zonën e Zvërnecit, duke pohuar se asnjë pjesë e territorit shtetëror nuk është nxjerrë në shitje dhe se procedurat po zhvillohen sipas ligjit. Ai sqaroi se Ishulli i Sazanit është pronë shtetërore dhe nuk është planifikuar për shitje; modeli i zhvillimit parashikon partneritet me investitorët ku shteti do të mbajë pjesëmarrje, por negociatat janë ende të hapura dhe nuk ka marrëveshje përfundimtare. Për Zvërnecin, Rama theksoi se toka është pronë private e regjistruar në kadastër prej vitesh dhe transaksionet janë marrëdhënie mes subjekteve private, ndërsa pretendimet e palëve të tjera po shqyrtohen nga gjykatat. Ai përmendi se organet e drejtësisë vepruan në mënyrë të pavarur; në një rast SPAK kishte hetim ndaj një shitësi dhe shuma e derdhur është vendosur në një llogari të ngrirë, e cila mund të sekuestrohet e të shkojë në fondin e kompensimeve në rast të vendimit gjyqësor në favor të pretenduesve.
Rama deklaroi se projekti në Zvërnec nuk ka marrë ende leje ndërtimi dhe ndodhet në fazën e përgatitjes së dokumentacionit teknik. Investitorët janë të detyruar të iu nënshtrohen një Vlerësimi të Thelluar të Ndikimit në Mjedis (VTM) para çdo vendimmarrjeje përfundimtare. Sipas tij, masterplani zyrtar u paraqit në 2024 dhe u shqyrtua nga Këshilli Kombëtar i Territorit më 25 shtator 2024, i cili kërkoi rishikime thelbësore për uljen e intensitetit të zhvillimit dhe për masa mbrojtëse për lagunën dhe habitatet përreth. Më 30 mars 2026 KKT miratoi lejen zhvillimore (jo leje ndërtimi), e cila i hap rrugë përgatitjes së projektit të detajuar; leja e rrethimit për matje dhe studime u dha më 29 prill 2026. Pas përfundimit të screening dhe scoping, autoriteti mjedisor vendosi më 15 maj 2026 që projekti duhet t’i nënshtrohet një Vlerësimi të Thelluar të Ndikimit në Mjedis, i cili do të analizojë ndikimet mbi biodiversitetin, habitatet, ekosistemet bregdetare dhe lagunore, integritetin e peizazhit dhe qëndrueshmërinë afatgjatë. Përfundimet e VTM dhe opinioni i autoriteteve do të jenë referencë për vendimmarrjet e mëtejshme. Rama hodhi poshtë pretendimet për ndryshim statusi të zonave të mbrojtura; zona Pishë Poro–Nartë vazhdon të jetë “Peizazh i Mbrojtur” dhe zhvillimet duhet të përputhen me legjislacionin shqiptar dhe standardet evropiane. Ai akuzoi përhapjen e dezinformimit dhe vlerësoi veprimet e institucioneve si profesionale dhe transparente, duke përsëritur mbështetjen për investimet strategjike brenda kornizës ligjore dhe mjedisore.
