Irani ka intensifikuar në javët e fundit përpjekjet për të siguruar dhe izoluar rezervat e tij të uraniumit të pasuruar, afër nivelit të nevojshëm për armë bërthamore. Sipas burimeve të inteligjencës amerikane, disa tunele që çojnë te këto depozita janë shembur qëllimisht, ndërsa në hyrje janë vendosur mina, çka e bën shumë të vështirë dhe të rrezikshme qasjen te materialet. Rreth gjysmë ton uranium i pasuruar dyshohet të jetë i bllokuar në këto zona, duke e komplikuar edhe më tej çdo plan të Shteteve të Bashkuara për sekuestrimin e tij — plane përmendur më parë edhe nga presidenti amerikan Donald Trump.
Raporti thekson se këto zhvillime e vështirësojnë arritjen e një marrëveshjeje midis SHBA-së dhe Iranit, ku një nga kërkesat e paraqitura është dorëzimi dhe shkatërrimi i materialit bërthamor. Sipas CNN, masa të tilla komplikojnë negociatat dhe realizimin praktik të kërkesave për çarmatim. Ekspertët paralajmërojnë se edhe vetë autoritetet iraniane mund të përballen me vështirësi të mëdha për të arritur te materialet e izoluar pa pajisje të specializuara dhe operacione të gjera çminimi.
Një pjesë e rezervave besohet të jetë vendosur në komplekse të shembura në Isfahan, ndërsa pjesa tjetër ndodhet në zona të tjera të cilësuara si të sigurta. Vendosja e minave dhe shkatërrimi i tuneleve rrit rrezikun për misionet e qasjes dhe detyron përdorimin e logjistikës dhe pajisjeve të posaçme për të rimarrë kontrollin mbi materialet.
Zyrtarë amerikanë kanë diskutuar mundësinë e një marrëveshjeje sipas së cilës Irani do të dorëzonte uraniumin për shkatërrim, por kushtet e një marrëveshjeje të tillë mbeten të paqarta dhe të diskutueshme. Ekspertët vënë në dukje se masat e marra nga Irani mund t’i japin mundësinë shtetit të fshehë një pjesë të materialit bërthamor ose ta bëjë atë të paarritshëm për palët e tjera.
