Skuadra kombëtare e Anglisë është përballur me një grabitje pak ditë para debutimit zyrtar kundër Kroacisë në Kampionatin Botëror, pasi materiale teknike sportive rezultuan të vjedhura gjatë transferimit nga Palm Beach i Floridës në Kansas City, ku skuadra ka bazën e saj gjatë kompeticionit. Lajmi u dha fillimisht nga BBC dhe Sky News dhe u konfirmua më pas nga Federata Angleze e Futbollit, e cila nuk dha detaje shtesë për të mos penguar hetimet policore.
Sipas të dhënave paraprake, furgonët që transportonin materialet drejt Swope Soccer Village në Kansas City u hapën me forcë në mbrëmjen e së premtes, menjëherë pas mbërritjes në qytet. Ngjarja rrezikon të paralizojë aktivitetin e kombëtares para seancës së parë stërvitore të planifikuar për të shtunën. Nga inventari mungojnë qindra topa zyrtarë dhe uniformat e stërvitjes, pajisje mjekësore dhe disa pajisje teknologjike të përdorura nga trajneri Thomas Tuchel dhe stafi i tij. Raportohet gjithashtu për vjedhjen e këpucëve të personalizuara të lojtarëve, përfshirë ato të Harry Kane dhe Jude Bellingham.
Po diskutohet mundësia që të jenë zhdukur edhe uniformat zyrtare të ndeshjes, një informacion që ende nuk është konfirmuar, por që ka shkaktuar shqetësim te tifozët. Si pasojë, drejtuesit e Federatës Angleze të Futbollit kontaktuan menjëherë furnizuesit teknikë zyrtarë me synimin për të zëvendësuar me urgjencë materialet dhe për të shmangur pezullimin e detyruar të stërvitjeve.
Hetimet për ngjarjen po kryen departamenti i policisë së Kansas City. Në një komunikatë për shtyp hetuesit konfirmuan hapjen e hetimeve lidhur me një vjedhje të mundshme të një automjeti të skuadrës, që kishte mbërritur në orët e mbrëmjes dhe teksa supozohet se mungonin disa objekte. Në orët e fundit policia lokale njoftoi se dy persona janë ndaluar dhe po merren në pyetje në pritje të hetimeve të mëtejshme.
