Rritja e çmimit të naftës në dy muajt e fundit ka shkaktuar pasoja negative për ekonominë shqiptare, por guvernatori i Bankës së Shqipërisë, Gent Sejko, vlerëson se ndikimi do të jetë afatshkurtër dhe i kufizuar. Sejko tha se rritja e çmimit të naftës në tregjet ndërkombëtare gjatë vitit 2026 përbën një goditje negative të ofertës për Shqipërinë dhe partnerët tregtarë, por sipas vlerësimit të bankës qendrore, efekti mbi ekonominë pritet të jetë i kufizuar.
Gjatë raportimit vjetor në Komisionin e Ekonomisë, guvernatori njoftoi se inflacioni në vitin 2025 ishte 2.2%, tregues që ai përshkroi si stabilizim të çmimeve, ndërsa objektivi i BSH-së ishte 3%. Sejko theksoi se në dy vitet e fundit niveli i inflacionit ka qenë i ulët, i qëndrueshëm dhe poshtë, por pranë objektivit të bankës.
Deputeti socialist Erion Braçe shprehu shqetësim për nivelin e inflacionit në muajt e parë të këtij viti dhe kërkoi sqarime se si do të mbahet ai nën monitorim, duke pyetur veçanërisht për çmimet e ushqimeve dhe qiratë, çështje për të cilat sipas tij pyesin qytetarët. Si përgjigje, Sejko siguroi se banka do të monitorojë me kujdes ecurinë e inflacionit dhe synon të reagojë në kohën e duhur për të shmangur efektet e raundit të dytë dhe për të garantuar stabilitetin e çmimeve në ekonomi.
Vëllimi i aktivitetit ekonomik u rrit me 3.8%, sipas guvernatorit, të mbështetur nga bilancet e shëndosha të sektorit privat dhe përforcimi i aktiviteteve në turizëm dhe ndërtim. Në anën tjetër, bujqësia vazhdon të pësojë rënie, ndërsa industria dhe bujqësia shënojnë tkurrje, sipas shënimeve sektoriale të BSH-së.
Integrimi i Shqipërisë në sistemin evropian të pagesave SEPA solli transferime më të shpejta; operacionalizimi i SEPA-s në tetor ka mundësuar rreth 166 mijë transaksione me një vlerë totale prej rreth 2.2 miliardë eurosh.
