Ndeshja e dytë e Kupës së Botës 2026 mes Koresë së Jugut dhe Çekisë (2-1), e zhvilluar në stadiumin e Guadalajarës, u shoqërua me polemika për shkak të zonave të mëdha me vende bosh, duke rikthyer debatin rreth çmimeve të larta të biletave dhe menaxhimit të turneut nga FIFA. Organizatorët raportuan një pjesëmarrje prej 44,985 tifozësh, 679 më pak se kapaciteti i stadiumit, por pamjet televizive dhe reagimet në rrjetet sociale treguan se shumë sektorë të tribunave nuk ishin të mbushur.
Tifozët kritikuan FIFA-n, duke e akuzuar për strategji të gabuara të çmimeve dhe për menaxhim të dobët të shitjeve; sipas raportimeve, mijëra bileta kanë mbetur të pashitura. Në përpjekje për të mbushur stadiumet, çmimet e rishitjes për disa ndeshje janë ulur ndjeshëm. Një hetim i medias britanike The Sun zbuloi se në disa stadiume janë shitur më pak se gjysma e biletave për shkak të çmimeve të larta, ndërsa rreth 180,000 bileta kanë qenë ende të listuara në platformat zyrtare të rishitjes në prag të turneut.
Kjo situatë ka nxitur edhe reagime politike: autoritetet në Nju Jork, Nju Xhersi dhe Kaliforni kanë nisur veprime ligjore kundër FIFA-s, dhe çështja është diskutuar në Kongresin amerikan. Në rrjetet sociale tifozët shprehën zhgënjim për pamjen e stadiumeve gjysmë bosh, duke përshkruar situatën si “të paprecedentë” për një Kupë Bote dhe duke fajësuar rritjen e çmimeve për mungesën e interesit.
Në fushë, ndeshja solli emocione: Çekia kaloi e para me golin e Ladislav Krejci, por Koreja e Jugut përmbysi rezultatin me golat e Hëang In-beom dhe Oh Hyeon-gyu, duke marrë fitoren e parë në grup. Turneu vazhdon, ndërsa debati për aksesueshmërinë e biletave dhe mbushjen e stadiumeve pritet të mbetet një nga temat kryesore të Kupës së Botës 2026.
