Stadiumet e mbushura, aeroportet e tejngarkuara dhe fluksi i madh i vizitorëve për Kupën e Botës 2026 po ngre shqetësime te ekspertët e shëndetit publik, me vëmendje të veçantë tek fruthi. Kjo sëmundje shumë ngjitëse po rikthehet me ritme alarmante në Amerikën e Veriut dhe specialistët paralajmërojnë se grumbullimet masive gjatë turneut mund të krijojnë kushtet ideale për përhapjen e virusit. Sipas Dr. Krutika Kuppalli nga Qendra Mjekësore UT Southwestern në Dallas, fruthi është aktualisht shqetësimi kryesor i autoriteteve shëndetësore.
Rastet e fruthit në Shtetet e Bashkuara janë rritur ndjeshëm: gjatë vitit 2026 janë regjistruar afro 2,000 raste, shifër që barazon totalin e vitit 2025. Situata është shqetësuese edhe në Meksikë dhe Kanada, dy vendet e tjera pritëse të Botërorit. Pan American Health Organization (PAHO) njoftoi se rastet e fruthit në Amerikën e Veriut u dyfishuan gjatë vitit 2025 krahasuar me vitin paraprak, dhe drejtori i përgjithshëm i organizatës, Jarbas Barbosa, tha se trendi u përshpejtua më tej në 2026, me mbi 15,300 raste të regjistruara në rajon.
Ekspertët vënë në dukje se fruthi mund të mbetet në ajër deri në dy orë pasi një person i infektuar largohet nga një ambient, çka e bën transmetimin jashtëzakonisht të lehtë në vende me fluks të lartë njerëzish, si stadiumet, hotelet, restorantet, aeroportet dhe transporti publik. Epidemiologia amerikane Katelyn Jetelina theksoi se mjafton një rast i vetëm për të shkaktuar një zinxhir të madh infeksionesh dhe paralajmëroi se fruthi, i pranishëm në shumë pjesë të botës, mund të përhapet shpejt nëse gjen persona të pavaksinuar.
Autoritetet shëndetësore në qytetet pritëse të Botërorit po përgatiten për sfidën; Komisioneri i Shëndetësisë së Filadelfias, Palak Raval-Nelson, e përshkroi situatën si “një maratonë” për përpjekjet që do të nevojiten për të parandaluar përhapjen e sëmundjeve infektive gjatë turneut. PAHO vazhdon të bëjë thirrje për vaksinim, duke kujtuar se një person i infektuar mund të transmetojë virusin te deri në 18 persona të pambrojtur, dhe se vaksinimi mbetet arma më efektive për të frenuar rikthimin e sëmundjes dhe për të shmangur një krizë shëndetësore gjatë evenimentit.
