Policia po zhvillon kontrolle në disa zona të Tiranës, në Pëllumbas, Qafë Mollë dhe në fshatrat e Elbasanit, në kërkim të trupit të Eglant Koçit, i cili, sipas hetimeve, është vrarë nga shoku i tij. 34-vjeçari Eglant Koçi paraditen e 4 qershorit doli nga banesa për t’u takuar me shokun Armand Shakaj në një pallat në bulevardin “Zhan Dark”. Ai hyri brenda zyrës, por nuk doli më; në ambient policia gjeti gjurmë gjaku dhe mbetje biologjike që pritet të ndihmojnë hetimin.
Kati i dytë i pallatit ka disa njësi tregtare dhe korridoret janë të mbuluara me kamera, të cilat kanë regjistruar 34-vjeçarin duke hyre në ndërtesë, por jo duke dalë. Hetuesit thonë se Shakaj ka ndërhyrë në rrjedhën e provave duke shkëputur kamerat e brendshme të korridoreve. Pas ndërprerjes së kamerave, Shakaj dyshohet se urdhëroi kamerierin e lokalit të tij, Enea Zyferin, të ndërpresë energjinë elektrike, me qëllim që kamerat të mos kapnin transportimin e 34-vjeçarit nga zyra drejt makinës së autorit, një “Porsh” të parkuar jashtë pallatit.
Zyferiu u arrestua si bashkëpunëtor dhe, sipas burimeve, këtë të mërkurë Gjykata e Tiranës e la në burg deri në përfundim të hetimeve. Para gjykatës ai ka deklaruar se nuk ka dijeni për fatin e viktimës dhe se ka zbatuar urdhrat e pronarit; ka thënë se do të transportonte një frigorifer.
Pas disa ditësh hetimesh intensive, policia arriti të gjejë mjetin e autorit të dyshuar; në bagazhin e tij u gjetën materiale biologjike që janë dërguar për inspektim. Po ashtu, motorri i viktimës ka një rëndësi për hetimin: sipas hetimeve, autori i dyshuar e ka çuar fillimisht tek tregu elektrik dhe më pas në zonën e 5 Majit, ku e sekuestroi policia. Provat e sekuestruara nga zyra, makina dhe motori janë dërguar në laboratorin shkencor dhe pritet që ai të nxjerrë një përgjigje zyrtare.
