Botërori 2026, edicioni më i madh në histori për numrin e skuadrave, nis me një formë të pazakontë: ceremonia e hapjes do të zhvillohet në tri vende të ndryshme gjatë dy ditëve, me vendet pritëse si protagonistë. FIFA njoftoi se 900 persona do të jenë të përfshirë në organizim. Për realizimin e ceremonisë është angazhuar agjencia milaneze Balich Wonder Studio, e drejtuar nga Marco Balich, i cili ka përvojë në ceremonia hapëse të Lojërave Olimpike dhe në Botërorin 2022 në Katar.
Programi i hapjes është i përqendruar në 11 dhe 12 qershor: më 11 qershor në Meksikë dhe më 12 qershor në Kanada dhe SHBA. Në Meksikë ceremonia do të mbahet në stadiumin Azteca të Ciudad de México, më 11 qershor në orën 11:30 lokale (19:30 në Evropë). Të ftuar artistikë janë Shakira me Burna Boy për këngën zyrtare “Dai”, Alejandro Fernández, Belinda, Danny Ocean, J Balvin, Lila Doëns, Los Ángeles Azules, Maná dhe Tyla. Ndeshja hapëse Meksikë–Afrika e Jugut është e planifikuar për orën 13:00 lokale (21:00 në Evropë).
Më 12 qershor në Kanada ceremonia zhvillohet në BMO Field të Torontos, ora 13:30 lokale (21:30 në Evropë), me artistë si Alanis Morissette, Michael Bublé, Alessia Cara, Elyanna, Jessie Reyez, Nora Fatehi, Sanjoy, Vegedream dhe William Prince. Ndeshja Kanada–Bosnje Herzegovina nis në orën 15:00 lokale (23:00 në Evropë).
Po më 12 qershor, në SHBA ceremonia mbahet në SoFi Stadium të Los Angeles, ora 16:30 lokale (00:30 në Evropë), me performanca nga Katy Perry, Future, Anitta, LISA, Rema, Tyla dhe të tjerë që nuk janë bërë të ditur. Ndeshja SHBA–Paraguaj është e vendosur për orën 18:00 lokale (02:00 në Evropë).
Si kuriozitet, Shakira bëhet e para dhe e vetmja artiste në historinë e Botërorëve që krijon dhe interpreton himnin zyrtar në dy edicione të ndryshme, pas “Waka Waka” në 2010 dhe tani me “Dai Dai” për 2026. Gjithashtu, kjo është hera e parë që ceremonia e hapjes zhvillohet në tre qytete; më parë, edhe kur Botërori është mbajtur në dy vende, ceremonia mbahej në vetëm një stadium. Stadiumi Azteca bëhet i pari dhe deri tani i vetmi që pret tre ceremonia hapjeje: 1970, 1986 dhe 2026. Top Channel
