Shtetet e Bashkuara kryen më 10 qershor një rund të ri sulmesh ajrore ndaj shënjestrave ushtarake në Iran, ndërsa Irani reagoi me sulme hakmarrëse ndaj objekteve ushtarake amerikane në Bahrejn dhe Kuvajt. Komanda Qendrore e SHBA-së (CENTCOM) njoftoi se forcat e saj kryen goditje “vetëmbrojtëse” kundër kapaciteteve iraniane të mbikëqyrjes ushtarake, sistemeve të komunikimit dhe pozicioneve të mbrojtjes ajrore në të gjithë Iranin. Operacioni përfshiu mjete të Korpusit të Marinës, Forcave Ajrore dhe Marinës, duke përdorur municion me precizion të lartë për caqe që, sipas Uashingtonit, përbënin kërcënim për forcat amerikane dhe për transportin tregtar në ujërat e rajonit. CENTCOM e përshkroi veprimin si përgjigje ndaj “agresionit të pajustifikuar dhe të vazhdueshëm të Iranit” dhe tha se forcat amerikane janë “syhapur, të fuqishme dhe të gatshme”.
Menjëherë pas sulmeve amerikane, Trupat e Gardës Revolucionare Islamike (IRGC) njoftuan sulme kundër objektivave amerikane në Bahrejn dhe Kuvajt. IRGC tha se kishte goditur 18 caqe të lidhura me ushtrinë amerikane në dy valë operacionesh, përfshirë bazat ajrore “Ali Al Salem” dhe “Ahmed Al Jaber” në Kuvajt dhe bazën “Sheikh Isa” në Bahrejn. Zyrtarët amerikanë nuk kanë dhënë detaje për shkallën e dëmeve dhe ndikimi i sulmeve mbeti i paqartë.
Ministria e Brendshme e Bahrejnit raportoi aktivizimin e sirenave për sulme ajrore në gjithë mbretërinë dhe bëri thirrje që qytetarët të lëvizin drejt vendeve të sigurta. Autoriteti i aviacionit civil të Kuvajtit njoftoi më 11 qershor rihapjen e hapësirës ajrore dhe kthimin e trafikut komercial në normalitet pas mbylljes së përkohshme.
Sekretari i Përgjithshëm i OKB-së, Antonio Guterres, bëri thirrje për ndalimin e menjëhershëm të armiqësive, duke paralajmëruar se Lindja e Mesme po zhytet “gjithnjë e më thellë në krizë” dhe se pasojat shtrihen përtej rajonit. Konflikti vazhdoi pas një serie ngjarjesh: një ditë më parë SHBA kishte goditur shënjestra në Iran pas rrëzimit të një helikopteri ushtarak amerikan në Ngushticën e Hormuzit, dhe Irani kishte kryer më parë sulme ndaj bazave amerikane në rajon.
Presidenti amerikan Donald Trump pati deklaruar se “ne i goditëm fuqishëm dje dhe do t’i godasim përsëri fuqishëm sot” dhe pretendoi se SHBA kanë marrë naftë nga Irani: “Po e bëj publike sot për herë të parë, por ne kemi nxjerrë miliona fuçi naftë, miliona fuçi çdo natë”. Në të njëjtën kohë, negociatat midis Uashingtonit dhe Teheranit për një marrëveshje vazhdojnë, por çështje të ndërlikuara, përfshirë rezervat iraniane të uraniumit të pasuruar dhe çështjen e fondeve të ngrira, ende pengojnë arritjen e saj. Bordi i guvernatorëve të agjencisë bërthamore të OKB-së miratoi një rezolutë që kërkon sqarime nga Irani, të cilën Teherani e konsideroi “kundërproduktive”.
