Ish-sekretarja e Përgjithshme e Këshillit Rajonal të Bashkëpunimit dhe ish-ministrja e Integrimit Majlinda Bregu deklaroi se procesi i integrimit të Shqipërisë në Bashkimin Europian është më afër se kurrë. Ajo theksoi se vendimi për anëtarësim është krejtësisht politik i Brukselit dhe se vendi ka humbur kohë jo për faj të Europës apo Brukselit, por për faj të vetë Shqipërisë.
Zv.ministrja për Europën dhe Punët e Jashtme, Megi Fino, shpjegoi se anëtarësimi i Shqipërisë ka tani një kalendar kohor të përcaktuar. Ajo u shpreh se dëgjohet për mbylljen e negociatave në vitin e ardhshëm dhe se ekziston një angazhim për ta përfunduar integrimin brenda kësaj dekade.
Në një forum-podcast të organizuar nga Universiteti Europian i Tiranës dhe Diturium Media Lab u diskutua përdorimi i gjuhës dhe terminologjisë gjatë gjithë procesit të integrimit, e cila shpesh është rezultat i një fjalori të ndërlikuar dhe të vështirë për t’u kuptuar nga publiku dhe nga politika. Në këtë kuadër u prezantua një tekst universitar i destinuar për studentë dhe gazetarë të rinj, me qëllim që ata të mësojnë të përcjellin mesazhe të qarta dhe të kuptueshme ndaj audiencave.
Belina Budini, dekane e Universitetit Europian, vlerësoi rëndësinë e mediave në studimin e integrimit europian. Ajo theksoi se mediat duhet njohur si faktorë qendrorë dhe se është e nevojshme të u jepet vlera e duhur. Budini nënvizoi nevojën për kritikë kur media nuk shfaqet me gjuhën e saj të pavarur dhe kur përdor terma që publiku nuk përpunon lehtë.
Forumi nënvizoi gjithashtu se zhvillimet teknologjike nuk e zëvendësojnë rolin e mediave dhe të gazetarëve, të cilët mbeten një provë e rëndësishme për funksionimin e demokracisë. U theksua se e drejta për informim duhet të ecë paralelisht me përgjegjësinë publike dhe me rregulla të qarta që garantojnë lirinë e shprehjes.
