Kryeministri Edi Rama ka reaguar sërish në rrjetet sociale lidhur me protestat në Tiranë kundër projektit e Zvërnecit, duke përdorur si shembull zhvillimet në Mykonos për të argumentuar nevojën e tërheqjes së kapitalit të huaj në Shqipëri dhe për të kritikuar kundërshtimet ndaj investitorëve të mëdhenj. Rama thekson se vendet e rajonit dhe të Mesdheut konkurrojnë për investime ndërkombëtare dhe se Shqipëria nuk duhet t’i lejojë debatet dhe protestat të kthehen në pengesë për zhvillimin ekonomik dhe turistik. Ai vë në dukje se ndërsa Greqia vazhdon të tërheqë investime të huaja, në Shqipëri krijohen përçarje dhe konflikte që, sipas tij, pengojnë shfrytëzimin e mundësive të investimeve. Rama ngre pyetjen se si mund t’i mbyllin rrugët për kapitalet e mëdha, tani që ato po fillojnë të vijnë në Shqipëri pas përpjekjeve të mëdha për t’i sjellë këtu, dhe kritikët e shikon si një formë vetëçrregullimi kolektiv që Shqipëria nuk duhet ta pranojë.
Si pjesë e argumentit të tij, Rama citon përparimin e Mykonosit, ku marka të mëdha ndërkombëtare të hotelerisë po investojnë dhe ku pritet hapja e hoteleve të reja me pesë yje nga zinxhirë si Four Seasons, Fouquet’s dhe MGallery. Sipas përmbajtjes së artikullit që ai përmend, pavarësisht tensioneve gjeopolitike dhe një sezoni sfidues për turizmin, Mykonos vazhdon të mbetet një destinacion premium në Mesdhe. Kompanitë ajrore po rrisin kapacitetin hyrës për sezonin 2026 me rreth 7.1%, ndërsa po hapen linja të reja nga Roma, Londra, Abu Dhabi dhe Dubai, duke forcuar lidhjet ndërkombëtare të ishullit. Gjithashtu përmendet një resort i ri pesë yje me vlerë mbi 100 milionë euro, i lidhur me investitorin egjiptian Naguib Saëiris, i cili pritet të hapet në maj 2027.
Rama përdor këto shembuj për të argumentuar se zhvillimi i turizmit dhe i ekonomisë matet me investimet e huaja që tërhiqen dhe se bllokimet lokale mund të dëmtojnë konkurrueshmërinë e Shqipërisë në rajon.
