Donald Trump dhe Benjamin Netanyahu besonin se fitorja ndaj Iranit do të ndryshonte Lindjen e Mesme, por sipas Jeremy Bowen të BBC-së, rajoni po ndryshon jo në mënyrën që ata prisnin. Republika Islamike nuk është mundur dhe rreziku aktual është ai i një rrethi vicioz krizash që mund të përfshijë konflikte të hapura dhe tensione të vazhdueshme.
Bowen vëren se regjimi iranian doli të ishte një sfidë më e madhe se ç’e kishin supozuar Trump dhe Netanyahu. Si shembull ai përmend incidentin e fundit, rrëzimin e helikopterit amerikan Apache nga Irani, të cilin e interpreton si një kujtesë se udhëheqësit iranianë kanë kapacitetin t’i dëmtojnë amerikanët dhe janë të vendosur të dalin fitimtarë nga kjo përballje. Për udhëheqjen iraniane fitorja lidhet me mbijetesën e saj, përfshirë njohjen e kontrollit mbi Ngushticën e Hormuzit, një nga rrugët më strategjike detare në botë.
Trump kishte shpresuar në një marrëveshje me Iranin që të rihapte Ngushticën e Hormuzit dhe të negocionte kushtet e bisedimeve afatgjata mbi çështje më të mëdha, fillimisht rezervat e uraniumit të pasuruar dhe planet bërthamore më të gjera. Sipas Bowen, kjo nuk po ndodh. Lufta kundër Iranit nuk gjen mbështetje të gjerë në Amerikë, dhe Trump po kërkon një rrugëdalje që ta paraqesë si fitore, por kjo po rezulton e vështirë.
Analisti thekson se përvojat e Trump dhe Netanyahu rikthejnë një mësim të vjetër: që nga momenti që njerëzit zbuluan artin dhe mallkimin e luftës, liderët kanë kuptuar se është më e lehtë të ngrejnë një konflikt sesa ta çojnë deri në një përfundim me fitore të qartë. Në mungesë të një mposhtjeje të regjimit iranian dhe me rritjen e mundësive për incidente të dhunshme, rajoni mund të ngelet i prekshëm ndaj valësh krizash dhe përplasjeve të zgjatura.
Top Channel
