Presidenti i SHBA-së, Donald Trump, tha se e paralajmëroi kryeministrin izraelit Benjamin Netanyahu se Izraeli rrezikonte të qëndronte i vetëm përballë Iranit nëse vazhdonte përshkallëzimin e konfliktit. Në një bisedë me gazetarin Barak Ravid të Channel 12, Trump tha se Uashingtoni ishte njoftuar vetëm në minutën e fundit për sulmet ajrore të Izraelit ndaj Iranit dhe se kishte arritur të kufizonte fushëveprimin e tyre.
Sipas tij, gjatë një telefonate me Netanyahun të dielën në mbrëmje, ai i kërkoi liderit izraelit të mos i përgjigjej sulmeve me raketa balistike të Iranit, por biseda u përfundua pa një marrëveshje të qartë. Channel 12 raportoi se disa ndihmës të Trump që morën pjesë në telefonatë krijuan përshtypjen se presidenti amerikan kishte fituar disa ditë kohë për të mbështetur negociatat mes SHBA-së dhe Iranit për një marrëveshje të mundshme.
Pas telefonatës, Netanyahu zhvilloi konsultime me drejtuesit e sigurisë izraelite dhe më pas informoi Sekretarin amerikan të Shtetit, Marco Rubio, se kishte vendosur të vijonte me sulmet ndaj Iranit. Trump tha se pesë vende të rajonit, të angazhuara në përpjekjet ndërmjetësuese mes Uashingtonit dhe Teheranit, i kanë kërkuar atij të ushtrojë presion mbi Izraelin për të ndaluar sulmet dhe për t’i dhënë përparësi diplomacisë.
Sipas presidentit amerikan, zyrtarë iranianë kontaktuan SHBA-në të hënën në mëngjes dhe njoftuan se nuk do të kryenin sulme të tjera ndaj Izraelit, duke kërkuar në këmbim ndalimin e operacioneve izraelite. Trump deklaroi se pas këtij mesazhi ai kontaktoi sërish Netanyahun dhe e bindur të pranonte ndërprerjen e sulmeve të mëtejshme.
Në përfundim, Trump ritheksoi bindjen se një marrëveshje mes SHBA-së dhe Iranit mbetet e mundur dhe se Teherani është i gatshëm ta nënshkruajë atë. Ai tha se një marrëveshje mund të arrihet “brenda pak ditësh”, vlerësim që sipas tij e ka përsëritur vazhdimisht gjatë javëve të fundit.
