Autori i dyshuar për plagosjen e rëndë në Shijak, ngjarje e ndodhur pasditen e djeshme, është arrestuar. Policia njoftoi se Elton Beqiri është kapur dhe arrestuar për akuzën e plagosjes së rëndë të shtetasit Biond Guri. Lajmi u bë i ditur nga drejtori i Drejtorisë Vendore të Policisë Durrës, Ervin Hodaj, gjatë një komunikimi me mediat së bashku me Drejtorin e Drejtorisë Vendore për Kufirin dhe Migracionin, Altin Lila, ku u paraqitën rezultatet e punës së dy drejtorive për muajin maj.
Drejtori Hodaj theksoi prioritetet: siguria në shkolla, siguria rrugore, lufta kundër krimeve të rënda dhe narkotikëve, armëmbajtja pa leje, kapja e personave në kërkim, krimet mjedisore, dhuna në familje dhe reagimi në kohë. Për muajin maj janë evidentuar 383 vepra penale, prej të cilave janë zbuluar 382. Janë identifikuar 434 autorë të dyshuar: 117 janë vënë në pranga, 42 janë kapur në kërkim, 302 janë proceduar në gjendje të lirë dhe 15 janë shpallur në kërkim. Krahasuar me muajin e kaluar, janë evidentuar 136 vepra më shumë, ndërsa zbulueshmëria është rritur me 2%.
Gjatë periudhës janë finalizuar 10 operacione policore, ku u arrestuan 36 persona; u proceduan 4 në gjendje të lirë, 4 në arrest shtëpie dhe u shpallën në kërkim 3 shtetas. Operacionet përfshinë goditje ndaj tregtimit dhe shpërndarjes së narkotikëve — përfshirë dy operacione pranë shkollave në Kavajë dhe Shijak — mbajtje pa leje të armëve, kapjen e personave në kërkim, krime të rënda dhe krim ekonomik. Janë sekuestruar: 3 armë zjarri automatike (kallashnikov mod.56 me 2 krehëra dhe 120 fishekë), 1 armë gjahu, 6 armë sportive, 134 gr cannabis sativa, 60.17 gr kokainë, 4.410 euro, 92.200 lekë, 32 celularë dhe 4 automjete.
Janë trajtuar 373 konflikte, kryesisht në familje (370). Policia Rrugore vendosi 11.373 masa (3.155 më shumë se një muaj më parë). Janë regjistruar 10 aksidente me 4 të vdekur, 4 të plagosur rëndë dhe 8 lehtë. Për parandalim janë proceduar penalish 62 drejtues mjetesh; 34 prej tyre janë arrestuar (25 nën ndikimin e alkoolit) dhe 28 janë hetuar në gjendje të lirë.
Në fushën e krimeve mjedisore dhe të tokës janë evidentuar 5 vepra penale me 5 autorë të dyshuar; 1 shtetas është arrestuar dhe 5 janë proceduar penalisht. Janë shtuar kontrollet për ndërtimet pa leje (29 vepra më shumë) dhe janë kryer 1.074 kontrolle për kultivimin e bimëve narkotike (550 më shumë se maji i vitit të kaluar). Për sezonin turistik 2026 janë zhvilluar takime me autoritetet vendore për garantimin e rendit. Si problematika kryesore që kërkojnë vëmendje u identifikuan shkeljet rrugore (përfshirë përdorimin e alkoolit), dhuna në familje dhe prodhimi e shpërndarja e narkotikëve pranë shkollave. Policia deklaroi se ka rritur monitorimin, kontrollet dhe kontaktet me qytetarët, duke kërkuar bashkëpunim publik për parandalimin dhe adresimin e paligjshmërisë.
