Shtohen problemet në kombëtaren franceze vetëm katër ditë para fillimit të Botërorit, me një fushatë publicitare që ka shkaktuar pakënaqësi dhe tension në radhët e skuadrës. Sipas ‘L’Equipe’, Kylian Mbappé është ndër futbollistët që ka ngritur zërin kundër Federatës Franceze të Futbollit (FFF) pasi u përdor imazhi i tij për promovimin e një kompanie bastesh. Sulmuesi i Real Madridit mori pjesë të martën në aktivitete komerciale me sponsorët kryesorë të kombëtares, por gjatë miqësores me Bregun e Fildishtë të enjten imazhi i tij, së bashku me atë të Cherki, Doué, Olise dhe Dembélé, u përfshi nga kompania Betclic në një reklamë, gjë që pati si pasojë refuzimin e Mbappé për t’u lidhur me marka të tilla.
Prej vitesh Mbappé ka tentuar të kontrollojë të drejtat e tij të imazhit, duke shmangur lidhjet me kompani bastesh dhe fast-food, me qëllim që të mos shërbejë si shembull për fëmijët në këtë drejtim. Në 2023 ai kishte kërcënuar se nuk do të merrte pjesë në një akt komercial të kombëtares nëse nuk i tregoheshin futbollistëve kontratat e Federatës, edhe pse në atë rast u arrit një marrëveshje. Mbappé ka qenë ndër iniciatorët për rishikimin e kontratave të futbollistëve, por FFF, që kishte premtuar ndryshime klauzolash, ende nuk i ka modifikuar ato.
Betclic ushtroi të drejtën komerciale që kishte mbi futbollistët, ndërsa lojtaret shprehën pakënaqësi ndaj Federatës që nuk negocion një akord të ri. Përveç çështjes së promovimit të kompanive të basteve, është shfaqur edhe një konflikt tjetër rreth numrit të biletave për çdo futbollist — tetë në total, gjashtë prej të cilave me pagesë. Në horizont dalin detyrimet komerciale që shumë prej futbollistëve i refuzojnë, duke krijuar shqetësime të reja para udhëtimit drejt SHBA për fazën përgatitore dhe vetë Botërorit.
Federata Franceze e Futbollit duhet t’i zgjidhë këto çështje sa më shpejt që të jetë e mundur në mënyrë që të mos ndikojë në rendimentin e skuadrës gjatë Botërorit.
